Орхон аймаг болон Эрдэнэт үйлдвэр хамтын ажиллагааны хүрээнд Хангалын голын сав газрын гадаргын усны чанарт ээлжит хамтарсан хяналт-шинжилгээ хийлээ. Энэхүү ажлыг аймгийн Ус цаг уур, орчны шинжилгээний төвийн Байгаль орчны лаборатори болон Эрдэнэт үйлдвэрийн Байгаль орчин, ногоон хөгжлийн хэлтсийн харьяа Байгаль орчны лабораториуд 2019 оноос хойш тогтмол хэрэгжүүлж байна.
Хяналт-шинжилгээг жил бүр, баталсан мониторингийн хөтөлбөр, төлөвлөгөөний дагуу зохион байгуулдаг бөгөөд энэ удаад Эрдэнэт хотын дундуур урсах Эрдэнэт голын хоёр, Хангал голын гурван цэг болон Чингэлийн голоос нэг өдөр, нэгэн зэрэг усны дээж авч шинжиллээ.
Шинжилгээг MNS ISO/IEC 17025:2018 стандартын шаардлагад нийцсэн аргачлалаар хийж, усан дахь элементүүдийг тодорхойлон, хөндлөнгийн хяналтыг баталгаажуулсан байна.
2025 оны шинжилгээний дүнгээр Хангал-Эрдэнэт доод болон Хангал-Улаантолгой цэгүүдэд сульфатын агууламж зөвшөөрөгдөх хэмжээнээс хоёр дахин их гарчээ. Мэргэжилтнүүдийн үзэж буйгаар голын усанд сульфатын ион давамгайлж буйд тухайн бүс нутгийн хурдас чулуулгийн тогтоц зэрэг байгалийн хүчин зүйлээс гадна үйлдвэржилт, хотжилт, төвлөрсөн хогийн цэг болон ахуйн гаралтай хаягдлын нөлөө голлон нөлөөлж байгаа аж.
Мөн жил бүрийн сорилтын дүнг өмнөх онуудтай харьцуулахад усны эрдсийн бүрэлдэхүүн тогтвортой, огцом өөрчлөлтгүй байгаа нь тогтоогдсон байна.
Харин Хангал-Эрдэнэт доод болон Хангал-Улаантолгой цэгүүдэд шим бохирдлын үзүүлэлт MNS 4586:2024 стандартын III зэргийн зөвшөөрөгдөх дээд хэмжээнээс давсан үзүүлэлттэй гарчээ. Энэ нь ахуйн бохирдол болон газар тариалангийн үйл ажиллагааны нөлөөлөлтэй холбоотой байж болзошгүйг мэргэжилтнүүд онцолж байна.
Ийнхүү хамтарсан хяналт-шинжилгээ нь Хангалын голын сав газрын усны чанарын өөрчлөлтийг тогтмол хянах, байгаль орчны эрсдэлийг үнэлэх, цаашдын хамгаалалтын арга хэмжээг төлөвлөхөд чухал ач холбогдолтой юм.
Нар минутад мандаж минутад жаргана.
Үс засуулвал: 
Суудал: 
