Одоогоос 21 жилийн өмнө Эрдэнэт үйлдвэртэй хамтын ажиллагаагаа эхлүүлсэн Моннис групп LIEBHERR брэндийн R9350E загварын найм дахь экскаваторын түлхүүр гардуулах ёслолын ажиллагааг өнөөдөр Ил уурхайн засварын талбайд зохион байгууллаа. Уг ёслолд Бүгд Найрамдах Франц Улсаас Монгол Улсад суугаа Онц бөгөөд Бүрэн эрхт Элчин сайд, хатагтай Коринн Пэрера, LIEBHERR брэндийн Азийн бүс хариуцсан менежер Бэртранд Бедо, “Эрдэнэт үйлдвэр” ТӨҮГ-ын Ерөнхий захирал Г.Ёндон, Үйлдвэрлэл, техникийн бодлогын газрын дарга П.Батболор, Захиргаа, удирдлага, санхүүгийн газрын дарга Д.Баярбат, Ерөнхий уурхайчин Д.Эрдэнэбаатар тэргүүтэй хэлтэс, цехийн удирдлагууд, уурхайчин хамт олны төлөөлөл, Моннис группийн Ерөнхий захирал Б.Чулуунбаатар нарын хүндэт зочид оролцлоо.
Эрдэнэт үйлдвэрт LIEBHERR R9350E экскаваторыг хүлээлгэн өгөх ёслолыг нээж, Моннис группийн Ерөнхий захирал Б.Чулуунбаатар хэлсэн үгэндээ, бидний хамтын ажиллагаа 2005 онд LIEBHERR R9350 загварын цахилгаан экскаватор нийлүүлснээр эхэлж байсныг дурдаад, түүнээс хойш хамтын ажиллагаа экскаватор нийлүүлэлтээр хязгаарлагдалгүй, уул уурхайн тоног төхөөрөмж, бульдозер, автокран, Францын бутлуур, тос тосолгооны материал, сэлбэг, эд анги, засвар үйлчилгээ зэрэг олон чиглэлд өргөжин хөгжиж байгааг онцолсон.
Өнөөдөр хүлээлгэн өгсөн LIEBHERR R9350E загварын шууд утгуурт цахилгаа экскаватор нь Эрдэнэт үйлдвэрт нийлүүлэгдэж буй найм дахь “LIEBHERR” бөгөөд дараагийнх нь ирэх есдүгээр сард ирэх юм. Чанар, найдвартай ажиллагаа, инженерийн шийдлээрээ олон улсад нэр хүндтэй “LIEBHERR” брэндийн уул уурхайн техникүүд нь Ил уурхайн хүнд нөхцөлд тасралтгүй ажиллах зориулалттай, өндөр хүчин чадалтай, урт хугацааны ашиглалт даахуйц давуу талтайгаас гадна Монголын эрс тэс уур амьсгалд, “Эрдэнэт үйлдвэр” ТӨҮГ-ын үйлдвэрлэлийн хэрэгцээ шаардлагад нийцүүлэн тоноглосон болохыг нийлүүлэгчид энэ үеэр танилцуулсан.
Экскаваторын түлхүүр гардуулах энэхүү ёслол нь нэг техник хүлээлгэн өгөх үйл ажиллагаа төдий биш, 2005 оноос эхэлсэн “Эрдэнэт үйлдвэр” ТӨҮГ, Моннис групп хоорондын хамтын ажиллагаа, итгэлцлийн үр дүнг илэрхийлсэн чухал үйл явдал боллоо.
Нар минутад мандаж минутад жаргана.
Үс засуулвал: 
Суудал: 
