Уурхайчдын дөрвөн төрөлт тэмцээн боллоо

Ил уурхайн ажилчдын дунд олс таталт, корнхолл, бадминтон, дартсын аварга шалгаруулах тэмцээн өнөөдөр Спорт цогцолборын их зааланд боллоо.

Ганцаарчилсан болон багийн төрлөөр явагдсан энэхүү тэмцээнд нийт 200 гаруй уурхайчин оролцож, техник ур чадвар, авхаалж самбаа, хурд хүчээ сорин өрсөлдсөн юм.

Дартсын тэмцээнд У.Отгонбат ахлагчтай Цахилгаан тоног төхөөрөмжийн засварын хэсгийн тамирчид тэргүүн байрт шалгарч, Ч.Очхүү ахлагчтай Зам овоолгын хэсэг дэд байр, Б.Тэмүгэ ахлагчтай Захиргааны хэсэг гутгаар байр эзлэв. Харин корнхоллын тэмцээнд Н.Нандинцэцэг ахлагчтай Захиргааны хэсэг хошуучилж, Д.Анхцэцэг ахлагчтай Уулын ажлын хэсэг хоёрдугаар байр, Ч.Баянтуул ахлагчтай Уулын тоног төхөөрөмжийн засварын хэсэг гуравдугаар байрт шалгарлаа. Бадминтоны тэмцээнд Б.Бямбадорж ахлагчтай Уулын ажлын хэсэг тэргүүн байр эзэлж, С.Энхтайван ахлагчтай Уулын тоног төхөөрөмжийн засварын хэсэг, Л.Төгөлдөр ахлагчтай Зам овоолгын хэсэг удаалав. Харин олт таталтын тэмцээнд О.Цогтбаяр ахлагчтай Уулын ажлын хэсэг хамтын хүчээрээ илүүрхэж тэргүүн байрын шагнал хүртсэн бол Б.Ариунбаяр ахлагчтай Зам овоолгын хэсэг дэд байр, М.Сүхбат ахлагчтай Цахилгаан тоног төхөөрөмжийн засварын хэсгийнхэн гутгаар байрын алдар хүртлээ.

Ил уурхай 545 ажилтныхаа чөлөөт цагийг зөв боловсон өнгөрүүлэх, спортоор хичээллэх сонирхлыг дэмжих, Ил уурхайн шигшээ багийг бүрдүүлэх зорилгоор уурхайчдынхаа дунд энэ онд 17 төрлийн тэмцээн, уралдаан зохион байгуулахаар төлөвлөжээ. Уурхайчдын спортын тэмцээнүүд өнгөрсөн гуравдугаар сараас эхэлсэн бөгөөд энэ удаагийнх хоёр дахь том өрсөлдөөн юм.

Ил уурхайн захиргаа, Үйлдвэрчний эвлэлийн хороотойгоо хамтран ирэх сарын 03-ны өдөр залуучууд, ахмад гэсэн хоёр насны ангиллаар волейболын тэмцээн явуулах бол үүний дараа Эмэгтэйчүүдийн зөвлөл, Залуучуудын холбоотойгоо хамтран Хөдөлмөрийн баатар, гавьяатууд, өндөр настан, эмэгтэйчүүд, залуучууд, шинэ ажилтнууд, анхан шатны удирдах ажилтнуудаа эн тэнцүү хувааж, баг бүрдүүлж оролцуулдаг онцлогтой, уламжлалт өргөн цар хүрээтэй тэмцээнээ тавдугаар сарын сүүлчээр зохион байгуулахаар төлөвлөсөн байна.