Хөдөлмөрийн аюулгүй байдал, эрүүл ахуйн мэдлэгийг хүртээмжтэй түгээх зорилгоор Эрдэнэт цогцолбор их сургууль дээр Эрдэнэт үйлдвэрт ажилладаг хэл яриа, сонсголын бэрхшээлтэй иргэдэд зориулсан ХАБЭА-н сургалт өчигдөр боллоо. Энэхүү сургалтыг танхимын хэлбэрээр, дохионы хэлний орчуулгатайгаар зохион байгуулав.
Анх удаа ийнхүү зохион байгуулагдсан тус сургалтад нийт 12 ажилтан хамрагдаж, хөдөлмөрийн эрүүл мэнд, аюулгүй байдлын ерөнхий ойлголт, хөдөлмөрийн тухай хууль, үйлдвэрлэлийн осол, аюултай хүчин зүйлс, тэдгээрээс урьдчилан сэргийлэх арга хэмжээ, мөн осолд өртөгсдөд үзүүлэх анхны тусламжийн талаар цогц мэдлэг олж авлаа.
Сургалтыг холбогдох салбарын мэргэжилтнүүд удирдан явуулсан бөгөөд оролцогчдод практик ач холбогдолтой мэдээллийг хүргэсэн нь онцлог байв. Эрдэнэт цогцолбор их сургуулийн захиргааны хэсгийн тэргүүлэх мэргэжилтэн Б.Цолмон “Хөдөлмөрийн аюулгүй байдал бол хүн бүрд хамаарах чухал асуудал. Иймд бид сургалтыг тэгш хүртээмжтэй хүргэх зорилгоор дохионы хэлний орчуулгатайгаар зохион байгуулж байна” хэмээн онцолсон юм. Мөн сургалтын агуулгыг өргөжүүлэн ХАБЭА-н зургаан хичээлийг цахим хэлбэрт шилжүүлж, дохионы хэл рүү хөрвүүлэн олон нийтэд хүргэхэд бэлэн болгосон нь энэ удаагийн сургалтын онцлох үр дүн боллоо. Энэхүү сургалт нь хөгжлийн бэрхшээлтэй иргэдийн хөдөлмөрийн аюулгүй байдлыг хангах, мэдлэг мэдээллийн хүртээмжийг нэмэгдүүлэхэд чиглэсэн бодитой алхам болж байна.
Нар минутад мандаж минутад жаргана.
Үс засуулвал: 
Суудал: 
