“Эрдэнэт үйлдвэр” ТӨҮГ-ын Улаанбаатар дахь Төлөөлөгчийн газрын харьяа Хэвлэл мэдээлэл, олон нийттэй харилцах алба, Монголын үндэсний олон нийтийн телевизийн MNB академитай хамтран “Зураглаачийн ахисан түвшин”-ий 32 цагийн сургалтыг амжилттай зохион байгууллаа.
Тус сургалтад “Эрдэнэт үйлдвэр” ТӨҮГ-ын гурван зураглаач, “Тусгал” телевизийн нэг зураглаач хамрагдаж, мэргэжлийн ур чадвараа дээшлүүлэв. Сургалтын хүрээнд оролцогчид хоёр өдрийн турш Монголын үндэсний олон нийтийн телевиз дээр ажиллаж, телевизийн уран бүтээлийн орчин үеийн чиг хандлага, дүрсний шийдэл, эвлүүлэг, өгүүлэмжийн онцлог зэрэг өргөн хүрээний сэдвээр мэдлэгээ тэлсэн байна. Орчин цагийн телевизийн урлаг нь дүрсээр илэрхийлэгдэх онцлогтой тул зураглаач хүнээс өндөр мэдрэмж, бүтээлч сэтгэлгээ, техник технологийн мэдлэг шаарддаг. Энэ хүрээнд сургалтаар зураглаачийн эзэмших ёстой ур чадвар, өнөөгийн шаардлага, дүрсээр өгүүлэхүйн урлагийн шинэ чиг хандлагыг онцлон судалжээ.
Мөн Эрдэнэт телевизийн зураглаачид хоёр өдрийн практик дадлага хийж, шууд дамжуулалт, студийн гэрэл тавилт, өнгө тохируулга, техник ашиглалтын чиглэлээр бодит орчинд ажилласан нь онцлог байлаа. Мэргэжлийн уран бүтээлчдээс туршлага судалж, онолыг практиктай хослуулсан үр дүнтэй сургалт болсныг оролцогчид онцолж байна.Энэ талаар “Эрдэнэт үйлдвэр” ТӨҮГ-ын Хэвлэл мэдээлэл, олон нийттэй харилцах албаны дарга Д.Ганчимэг хэлэхдээ: “Манай уран бүтээлчид мэргэжлийн өндөр түвшний багш нараас газар дээр нь ажиллаж суралцах үнэт боломжийг олж авлаа. Энэ сургалт нь тэдний бодит орчинд өөрсдийгөө хөгжүүлэх, мэргэшихэд чухал түлхэц боллоо” гэв.
Сургалтын үргэлжлэл болгон Ж.Нямсүх багш Эрдэнэт хотод ирж, практик сургалтыг гардан удирдсан юм.Тэрбээр студийн гэрэлтүүлэг, зураг авалтын өнцөг, тайз засалт, техник тоног төхөөрөмжийн зохион байгуулалт зэрэгт мэргэжлийн зөвлөгөө өгч, Эрдэнэт телевизийн студийн гэрлийн шийдлийг стандартын түвшинд хүргэхэд хувь нэмэр орууллаа. Ялангуяа стандарт бус таазтай студид гэрлийг хэрхэн зөв байрлуулах, дүрсний чанарыг сайжруулах нарийн шийдлүүдийг газар дээр нь зааж, бодит зураг авалтад хамтран ажилласан нь сургалтын үнэ цэнийг улам нэмэгдүүлэв.
Сургалтын төгсгөлд оролцогчдод батламж гардуулж, Эрдэнэт телевизийн зураглаач Б.Тунгалаг, Б.Сэроддамба, Б.Ялалт, техникч Д.Цогбадрах болон “Тусгал” телевизийн зураглаач Ж.Улаанхүү нар ахисан түвшний сургалтад амжилттай хамрагдсанаа баталгаажууллаа. Энэхүү сургалт нь орон нутгийн телевизийн уран бүтээлчдийн мэргэжлийн ур чадварыг ахиулж, орчин үеийн телевизийн контентийн чанарыг шинэ шатанд гаргахад чухал хувь нэмэр оруулсан үйл ажиллагаа боллоо.
Нар минутад мандаж минутад жаргана.
Үс засуулвал: 
Суудал: 
