Орхон аймгийн Эрдэнэт хотын түүх, хөгжил дэвшилд үнэтэй хувь нэмэр оруулсан эрхэм хүмүүсийн амьдрал, үйлсийг өгүүлсэн “Эрдэнэтийн хийморьлог эрчүүд” номын хоёрдугаар боть албан ёсоор нээлтээ хийж, уншигчдын хүртээл боллоо.
Түүхийг ард түмэн бүтээж, түүнийг бичгийн их хүмүүс туурвин үлдээдэг жамтай. Энэ утгаараа цаг хугацаанд бүдгэрэх учиртай дурсамж, бахархлыг мөнхжүүлэн үлдээх зорилготой энэхүү бүтээл нь арван жилийн өмнө эхний ботийг гаргаж байсан уламжлалаа үргэлжлүүлж буйгаараа онцлог юм.
“Эрдэнэтийн хийморьлог эрчүүд” номын хоёрдугаар ботид Эрдэнэт хотоос төрөн гарсан Монгол Улсын Хөдөлмөрийн баатар гурав, Гавьяат цолтон арав болон нийгмийн салбар бүрийн төлөөлөл болсон олон эрхмийн намтар, ажил үйлсийг багтаасан байна. Тэдний амьдралын түүх нь зөвхөн хувь хүний замнал төдийгүй Эрдэнэт хотын хөгжил, Монгол Улсын нийгмийн дэвшлийн бодит гэрч болон үлдэж буй юм.
Энэхүү бүтээл нь Эрдэнэт хотын хагас зуун жилийн ойд зориулан бүтээгдсэнээрээ онцгой ач холбогдолтой бөгөөд хотыг бүтээн босголцсон үе үеийн хийморьлог эрчүүдийн гавьяа зүтгэлийг алдаршуулсан түүхэн баримт бичиг болж байна.
Номыг бүтээх үйлсэд оролцсон сэтгүүлчид, судлаачид, уран бүтээлчид хамтын хүчээр ажиллаж, бодит түүхийг уран сайхны өндөр түвшинд туурвисан нь онцлог байв.
МСНЭ-ийн Орхон аймаг дахь салбарын тэргүүн, номын ерөнхий редактор М.Балжинням хэлэхдээ, “Эрдэнэтийн үе үеийн хөдөлмөрч, бүтээлч хүмүүсийн амьдрал, үйлсийг баримтжуулан үлдээх нь бидний зорилго байсаар ирсэн. Энэ удаагийн боть нь хамтын хөдөлмөрийн үр дүн, дараагийн үеийнхэнд өвлүүлэх үнэт бүтээл боллоо” хэмээн онцолсон юм. Ийнхүү хийморь, хөдөлмөр, бүтээн байгуулалтын түүхийг өгүүлэх уг бүтээл уншигчдад хүрч, Эрдэнэт хотын бахархалт хүмүүсийн амьдралын замналтай танилцах боломжийг нээж байна.
Нар минутад мандаж минутад жаргана.
Үс засуулвал: 
Суудал: 
