Оюуны өвийн тунгалаг рашаан “Монгол зурхай” ном хэвлэгдлээ

Монголчуудын үе дамжин өвлөгдөж ирсэн оюуны үнэт өв, зурхайн ухааныг орчин цагийн уншигчдад ойлгомжтойгоор тайлбарласан нэгэн шинэ бүтээл мэндэллээ. Монголын Зохиолчдын Эвлэлийн гишүүн, судлаач зохиолч Дамдины Пүрэв “Монгол зурхай танин мэдэхүйн тайлбар” номоо хэвлүүлэн уншигчдын хүртээл болгож байна. Энэхүү бүтээл нь монголчуудын үе дамжин өвлөгдөж ирсэн зурхайн ухаан, оюун санааны үнэт өв соёлоос дээжлэн авч, энгийн ойлгомжтой хэлбэрээр тайлбарлахыг зорьсноороо онцлог юм. Уламжлалт зурхайн судар, эрдэмтэн мэргэдийн бүтээлүүд нь ихэвчлэн мэргэшсэн хүрээний хүмүүст зориулагддаг, ойлгоход төвөгтэй байдгийг зохиогч онцлон, айл өрх бүрд хүрэхүйц танин мэдэхүйн бүтээл туурвихыг зорьжээ. Номд монгол хүний ахуй амьдрал, байгаль дэлхий, огторгуйн хөдөлгөөн, наран саран, од гаригийн нөлөөлөл зэрэг нь хүний амьдралтай хэрхэн уялддаг талаар өгүүлсэн байна. Мөн хүнийг өөрийгөө танин мэдэх, зөв амьдрах ухаанд суралцах, нийгмийн зөв харилцааг төлөвшүүлэхэд чиглэсэн гүн ухааны санааг шингээжээ. Зохиогчийн үзэж буйгаар, өнөөгийн нийгэмд олон зөрүүтэй мэдээлэл дунд үнэн зөвийг ялган танихад уламжлалт ухаан, өв соёлын мэдлэг чухал үүрэгтэй аж. Иймд энэхүү бүтээл нь уншигчдыг өвөг дээдсийнхээ оюуны өвтэй дахин холбож, эрүүл саруул ухамсар, зөв амьдралын хандлагыг төлөвшүүлэхэд хувь нэмэр оруулах зорилготой юм. Түүнчлэн уг номд “Ламын гэгээн” хэмээн алдаршсан Лувсанданзанжанцан зэрэг эрдэмтэн мэргэдийн бүтээл, үзэл санаанаас эш татан, уламжлал ба орчин цагийн сэтгэлгээг холбохыг хичээсэн байна.“Монгол зурхай бол тооны ухаан. Бодох арга нь өөр өөр боловч хариу нь нэг байдаг нь түүний үнэн чанарыг илтгэнэ” хэмээн зохиогч бүтээлдээ онцолжээ. “Монгол зурхай танин мэдэхүйн тайлбар” ном нь уншигчдыг өөрийгөө таних, амьдралын зөв хэм хэмжээг ухамсарлах, улмаар нийгмийн эерэг орчныг бүрдүүлэхэд чиглэсэн танин мэдэхүйн үнэ цэнтэй бүтээл болж байна.