Дулааны цахилгаан станцын 50 жилийн ойн хүрээнд зохион байгуулагдсан Урлагийн бага наадам Соёл урлагийн цогцолборын их танхимд амжилттай болж өнгөрлөө.
Энэхүү үйл ажиллагааг ДЦС-ын Захиргаа болон Үйлдвэрчний эвлэлийн хороо хамтран зохион байгуулсан бөгөөд ажилтнуудын дунд эерэг уур амьсгал бүрдүүлэх, шинэ залуу уран бүтээлчдийг нээн илрүүлэх, мөн шилдэг оролцогчдыг 50 жилийн ойн хүндэтгэлийн тоглолтод шалгаруулах зорилготой байв.
Наадамд Турбины хэсэг, Зуухны хэсэг, Засвар механикийн хэсэг, Цахилгаан техникийн хэсэг, Захиргааны хэсэг болон Үйлдвэр техникийн товчоо, Түлш дамжуулах хэсэг, Хими ус бэлтгэлийн хэсэг болон Дулааны шугам сүлжээний хэсгийн уран бүтээлчид оролцож, нийт 7 баг өрсөлдлөө. Энэ удаагийн онцлог нь хамтарсан багууд оролцсон явдал байсан бөгөөд хөгжөөн дэмжигчдийн идэвх, уур амьсгал өндөр байв.
Оролцогчид Монголын уламжлалт язгуур урлагийг орчин үеийн шийдэлтэй хослуулсан олон төрлийн сонирхолтой үзүүлбэрүүдийг толилуулсан юм. Үүнд уртын дуу, хөөмий, бий биелгээ зэрэг язгуур урлагийн төрөл, орчин үеийн дуу бүжиг, шоу элементүүд, мөн “Яг түүн шиг” төрлийн үзүүлбэрүүд багтсан нь үзэгчдэд өв соёл, орчин үеийн урлагийн уялдаа холбоог мэдрүүлсэн бүтээлч наадам болсныг харууллаа.
Тэмцээний үр дүнгээр төрөл тус бүрийн шилдгүүдийг шалгаруулж, язгуур урлагийн төрөлд Засвар механикийн хэсэг тэргүүлж, Зуухны хэсэг, Түлш дамжуулах хэсгүүд удаалсан бол дууны төрөлд Түлш дамжуулах хэсэг, Цахилгаан техникийн хэсэг, Зуухны хэсгүүд эхний гурван байрыг эзэллээ. Бүжгийн төрөлд Цахилгаан техникийн хэсэг тэргүүлж, Зуухны хэсэг, Засвар механикийн хэсгүүд шагналт байрт шалгарсан байна. Харин “Яг түүн шиг” төрөлд Түлш дамжуулах хэсэг шилдэг байж, Засвар механикийн хэсэг, Цахилгаан техникийн хэсгүүд удааллаа. Нийлбэр дүнгээр Түлш дамжуулах хэсэг тэргүүн байрыг эзэлж, Засвар механикийн хэсэг дэд байр, Цахилгаан техникийн хэсэг гуравдугаар байрт шалгарлаа.
Энэхүү бага наадам нь ажилтнуудын авьяас чадварыг нээн илрүүлж, хамт олны уур амьсгалыг эерэгээр дэмжсэн, байгууллагын соёл, нэгдлийг бэхжүүлэхэд чухал ач холбогдолтой арга хэмжээ боллоо. Ахмад үеийн туршлага, залуу үеийн эрч хүч хосолсон энэхүү наадам нь ирэх 50 жилийн ойн хүндэтгэлийн тоглолтын өнгө төрхийг тодорхойлсон онцгой үйл явдал болсноороо онцлог байв.
Ийнхүү ДЦС-ын Урлагийн бага наадам нь зөвхөн уралдаан тэмцээн төдийгүй хамт олны эв нэгдэл, бүтээлч сэтгэлгээ, соёлын хөгжлийг дэмжсэн цогц арга хэмжээ болж амжилттай өндөрлөлөө.
Нар минутад мандаж минутад жаргана.
Үс засуулвал: 
Суудал: 
