Аж үйлдвэрийн ажилтны баярын өдрийг тохиолдуулан Эрдэнэт үйлдвэрийн Засвар угсралтын цех баярын хурал зохион байгуулж, ажил үйлсээрээ манлайлж, олон нийтийн үйл ажиллагаанд идэвх санаачилгатай оролцдог тэргүүний ажилтнуудаа шагнаж урамшууллаа.
Соёл, урлагийн цогцолборын бага танхимд болсон баярын хурлыг Засвар угсралтын цехийн дарга Х.Баяраа нээж, үг хэлэхдээ өөрийн цехийг үүсгэн байгуулсан түүх дурсамжаа хүүрнэж, тэр үед гол ажлыг гаднын байгууллага, гадаадын мэргэжилтнүүд хийдэг байсан бол одоо үндэсний мэргэжилтнүүд цахилгаан, агааржуулалт, механикийн гээд бүх чиглэлийн ажлыг түлхүүр гардуулах нөхцлийн хэмжээнд хийж гүйцэтгэдэг, өндөр ур чадвартай хамт олон бүрдсэнийг онцлон баяр хүргэсэн юм.
Засвар угсралтын цехийн 35 жилийн ойн хүрээнд зохион байгуулсан мэргэжлийн баярын үеэр Цахилгаан ба хийн гагнуурчин З.Ганзориг, К.Батмандал нар Орхон аймгийн “Засаг даргын жуух бичиг”-ээр шагнагдаж, мастер Г.Амгаланд Монгол Улсын хөгжил цэцэглэлтэд оруулсан хувь нэмрийг нь үнэлэн МЗХ-ны “Тэргүүний залуу” алтан медаль, Тоног төхөөрөмжийн засварчин Г.Дөлгөөнд үйлдвэрчний эвлэлийн хөдөлгөөнийг бэхжүүлж, уул уурхайн салбарын хөгжилд оруулсан хувь нэмрийг үнэлж “Уурхайчны Алдар” цол тэмдэг олгов. Түүнээс гадна Аж үйлдвэрийн ажилтны өдрийг тохиолдуулан эрхэлсэн ажилдаа амжилт гаргасан 26 ажилтанд мөнгөн урамшуулал олгох тушаал уншиж танилцууллаа.
Мөн тус цехэд хоёргүй сэтгэлээр 25 жил ажиллаад гавьяаныхаа амралтад гарч буй цахилгаан ба хийн гагнуурчин Б.Нямдаваад мэдлэг чадвараа үйлдвэртээ бүрэн зориулж, олон жил үр бүтээлтэй ажиллаж, залуу үеэ бэлтгэх үйлсэд үнэтэй хувь нэмэр оруулсанд хамт олон нь талархал илэрхийлж, гарын бэлэг, дурсамж хадгалуулсан юм.
Баярын хурлын дараа тус цехийн Засвар угсралтын хэсгийн ажилтнуудын дунд мэдлэг сорих асуулт хариултын “QUIZ SHOW” тэмцээн болж, зургаан багийн 24 ажилтан оролцлоо. Танин мэдэхүй, ажил мэргэжил, хурдны үе, сэтгэн бодох гэсэн дөрвөн үе шаттай явагдсан уг тэмцээнд М.Хатанбаатар ахлагчтай “Майнерс” баг тэргүүлж, Э.Энхбаатар ахлагчтай “Морьтон”, Г.Дагва-Очир ахлагчтай “Чимээгүй” баг удааллаа.
Нар минутад мандаж минутад жаргана.
Үс засуулвал: 
Суудал: 
