Мэргэжлийн боловсролыг дэмжин ажиллаж буй “Эрдэнэт үйлдвэр” ТӨҮГ-ыг "Worldskills International" олон улсын байгууллагаас үнэлэн, гэрчилгээ олголоо. Тус байгууллагын Монгол дахь төлөөлөл "Worldskills Mongolia" ТББ-ын Төлөөлөн Удирдах Зөвлөлийн дарга Ц.Чадраабал, Монгол улсын техникийн төлөөлөгч Э.Энхболд нар хүрэлцэн ирж, Ерөнхий захирал Г.Ёндонд уг гэрчилгээг гардуулахдаа, “Эрдэнэт үйлдвэр, мэргэжлийн боловсролын салбарт залуучуудын хөдөлмөр эрхлэлт, ур чадварыг дээшлүүлэхэд урт хугацаанд, тууштай хувь нэмэр оруулж буйг нь үнэлэн, олгож байна” гэж тэмдэглэсэн.
Дэлхий нийтэд мэргэжлийн боловсролыг сурталчлан дэлгэрүүлэх, тогтолцоонд шинэ тогтолцоо нэвтрүүлж, мэргэжлийн ур чадварыг дээшлүүлэх зорилго, үүрэг бүхий тус байгууллагад одоогоор 90 гаруй улс орон нэгдсэн байна. Харин манай улс 2014 онд тус байгууллагад гишүүнээр элсэж, мэргэжлийн боловсролын ур чадварын тэмцээнд оролцож ирсэн. Энэ үеэс Эрдэнэт үйлдвэр, мэргэжлийн боловсролын ур чадвар, тэр дундаа CNC токарийн мэргэжлийг хөгжүүлэх, тэмцээнд оролцох мэргэжилтнүүдийг бэлтгэх боломжоор бүрэн хангаж, дэмжин ажиллаж байна.
2024 онд Франц улсад зохиогдсон дэлхийн аварга шалгаруулах тэмцээнээс Монгол Улс CNC токарийн төрөлд "Medallion of excellence" тусгай байрын шагнал хүртсэн. Энэ амжилт Эрдэнэт үйлдвэрийн дэмжлэг, туслалцааны үр дүн гэж тус байгууллагаас үнэлдэг. Эрдэнэт үйлдвэрийн Засвар, механикийн заводод суурилагдсан CNC токарийн тоног төхөөрөмж нь орчин үеийн дэвшилтэт технологи, мэргэжлийн шаардлага хангасан учраас энд бэлтгэл хангасан залуучууд ур чадварын тэмцээнд шууд оролцох боломжтой болдгоороо давуу талтай.
Дэлхийн ур чадварын тэмцээнд манай улсаас нийт 37 хүүхэд, залуус гагнуур, токарь, сантехник, цахилгаан, тогооч, мужаан зэрэг мэргэжлээр оролцож ирсэн бөгөөд энэ жилээс орчин цагт хамгийн эрэлттэй болж буй механик инженер CAD, график дизайн, химийн лаборант, авто засвар, хуурай хийц гэх мэт таван мэргэжил нэмэгдэж, нийт 12 мэргэжлээр дэлхийд ур чадвараа сорин өрсөлдөхөөр болж байна. Ирэх 9 дүгээр сард БНХАУ-ын Шанхай хотод болох тэмцээнд дээрх мэргэжлүүдээр оролцох үндэсний аваргууд тодорч, бэлтгэл хангаж байгаа” гэж Монгол Улсын техникийн төлөөлөгч Э.Энхболд онцлов.
Тус тэмцээнд оролцох эрхтэй болсон үндэсний ялагчийн нэг нь Эрдэнэт үйлдвэрийн дэргэдэх “Эрдэнэт” цогцолбор их сургуулийн Коосен коллежийн химийн инженерчлэлийн ангийн 3 курсийн оюутан Э.Саруултөгөлдөр юм. Тэрээр 6-р ангиасаа химийн хичээлийг сонирхож, сүүлийн гурван жилд гүнзгийрүүлэн судалсан нь үндэсний ялагч болоход нөлөөлсөн байна.
Мөн Эрдэнэт үйлдвэрээс CNC токарийн төрөлд олон улсын эксперт буюу сургагч багшаар Засвар, механикийн заводын инженер, зохион бүтээгч Г.Энхбат шалгарсан юм.
Нар минутад мандаж минутад жаргана.
Үс засуулвал: 
Суудал: 
