Эрин зууны бахархал Эрдэнэт хотын 50 жилийн ойн хүрээнд Казах түмний Наурыз буюу хаврын баярыг энэ жил Орхон аймагт өргөн дэлгэр тэмдэглэхээр бэлтгэж буй зохион байгуулагчид өнөөдөр хэвлэлийн бага хурал хийлээ.
Энэ долоо хоногийн амралтын өдрүүд буюу гуравдугаар сарын 14-ний бямба гарагт Соёл, урлагийн цогцолборт болох Баярын хурал, Баян-Өлгий аймгийн М.Хурманханы нэрэмжит, “Алтангадас” одонт Хөгжимт драмын театрын уран бүтээлчдийн урлагийн тоглолтоор эхлэх “Наурыз 2026” баяр 15-ны ням гарагт Эрдэнэт хотын цэнгэлдэх хүрээлэнд Бүргэдчдийн парад-аар нээлтээ хийхээр төлөвлөжээ.
Нээлтийн үйл ажиллагаанд урлагийн тоглолт, бүргэдийн болон морин спортын үзүүлбэр зэрэг Казах түмний өв соёлыг харуулсан сонирхолтой олон үйл ажиллагааг Эрдэнэтчүүддээ толилуулах юм байна.
“Наурыз 2026” баярын хөтөлбөрт тив, дэлхийн нүүдэлчдийн наадмын морьт барилдаан (Аударыспак), тулам булаалдах (Көкпар), морин дээрээс зоос шүүрэх (Тенге илу) тэмцээн, морин дээрх шилдэг үзүүлбэрүүд (Кыз куар) багтсан байна. Энэхүү өргөн дэлгэр баяр, наадамд оролцохоор Морин спортын Үндэсний холбооны тамирчдаас гадна Баян-Өлгий аймгийн Засаг дарга, бүргэдчид, “Алтангадас” одонт Хөгжимт драмын театрын уран бүтээлчид баруун алтайгаас хүрэлцэн иржээ.
Тус наадмын Ерөнхий зохион байгуулагчаар Орхон аймгийн Засаг даргын тамгын газар, Орхон аймаг дахь Баян-Өлгий аймгийн нутгийн зөвлөл ажиллаж байгаа бол Орхон аймгийн Соёл урлаг, аялал жуулчлал, залуучуудын газар, Биеийн тамир спортын газар, “Эрдэнэт үйлдвэр” ТӨҮГ, Баян-Өндөр сумын Засаг даргын тамгын газар, “Эрдэнэт үйлдвэр” ТӨҮГ-ын Үйлдвэрчний холбоод хамтран зохион байгуулагчаар ажиллаж байна.
Нар минутад мандаж минутад жаргана.
Үс засуулвал: 
Суудал: 
