“Эрдэнэт үйлдвэр” ТӨҮГ сүүлийн таван жилийн хугацаанд нийт 437 томоохон үйл ажиллагаа зохион байгуулж, 7000 гаруй зочин хүлээн авчээ. Энэ нь жилд дунджаар гадаад, дотоодын 1000–2000 зочин хүлээн авч, олон төрлийн үйл ажиллагаа зохион байгуулдаг гэсэн үг юм. Эдгээр үйл ажиллагааг зохион байгуулахад гардан оролцдог хүний нөөцийн мэргэжилтнүүд, албан хэрэг хөтлөлтийн ажилтнууд, Хүний нөөцийн хөгжлийн цогц хөтөлбөрийн ажлын хэсгийн гишүүд, соёл, олон түмний арга зүйчид өнөөдөр “Дотоод үйл ажиллагаа зохион байгуулахад анхаарах асуудал” сэдэвт сургалтад хамрагдаж байна.
Сургалтыг нээж, Хүний нөөц, захиргааны хэлтсийн дарга О.Отгонбаяр хэлсэн үгэндээ, “Аливаа үйл ажиллагааны үр дүн, оролцогчдын сэтгэл ханамж зөвхөн зохион байгуулагч талаас шалтгаалахгүй. Оролцогчдын идэвх оролцооноос ихээхэн хамаардаг. Сургалт, хөгжлийн үйл ажиллагаа тасралтгүй байж гэмээнэ хүний хөгжил, байгууллагын соёл, ажлын үр дүнд эерэг нөлөө үзүүлдэг” хэмээн онцоллоо.
Өнгөрсөн жил энэ төрлийн сургалтыг Гадаад харилцааны яам, Ахмад дипломатчидын холбоо, Гадаад харилцаа, экспортын хэлтэс, Хүний нөөц, захиргааны хэлтэс хамтран үйлдвэрийн удирдах ажилтнуудад амжилттай зохион байгуулсан. Харин энэ удаагийн сургалтыг “Эрдэнэт үйлдвэр” ТӨҮГ-ын Хүний нөөц, захиргааны хэлтэс, Гадаад харилцаа, экспортын хэлтсийн Гадаад харилцааны алба, Соёл, урлагийн цогцолборын Соёлын сектор хамтран, байгууллагын соёлыг төлөвшүүлэх, үйл ажиллагааг зохион байгуулах чиг үүрэг бүхий ажилтнуудад үе шаттайгаар явуулж эхэллээ.
Сургалтад оролцогчид үйл ажиллагааны зэрэглэл, анхаарах асуудал, бэлтгэл ажлын төлөвлөгөө боловсруулах, хөтөлбөр болон чек-лист ашиглах, цахим хөтөч бэлтгэх, зочдыг угтах, үйлчлэх, үдэх ёслол, сценари боловсруулах, хөтлөгчийн ур чадвар, оролцогчдын бүртгэл, санал асуулга зэрэг сэдвээр мэдлэгээ нэмэгдүүлэв.
Сургалтын хоёр дахь хэсэгт, оролцогчид дөрвөн багт хуваагдан дадлага ажил гүйцэтгэж, үйл ажиллагаа зохион байгуулах үеийн бодит нөхцөлд тулгуурласан шийдлүүдийг боловсрууллаа.
Олон хоногийн бэлтгэлтэй үйл ажиллагаа ганцхан техникийн саатал, цагийн хоцрогдол, зохион байгуулалтын жижиг алдаанаас шалтгаалан үр дүн нь буурах эрсдэлтэй байдаг. Иймээс энэхүү сургалт нь үйл ажиллагааг мэргэжлийн түвшинд, зохион байгуулах ур чадварыг дээшлүүлэхэд чиглэж байна.
Нар минутад мандаж минутад жаргана.
Үс засуулвал: 
Суудал: 
