Ерөнхий захиргааны ажилтнуудын ЦАСНЫ БАЯР болов

Эрдэнэт үйлдвэрийн Ерөнхий захиргааны ажилтнуудын Цасны баяр өнгөрсөн бямба гарагт Сархиа цанын баазад амжилттай зохион байгуулагдлаа.

Хамт олны эв нэгдлийг бэхжүүлэх, багаар ажиллах ур чадварыг нэмэгдүүлэх, эрүүл идэвхтэй амьдралын хэв маягийг түгээн дэлгэрүүлэх зорилготой энэхүү баярт зургаан багийн 220 гаруй ажилтан оролцов. Тэд амралтын өдрөө хээрийн амтат зоог, идэвхтэй хөдөлгөөн, уралдаан тэмцээн, инээд хөөрөөр дүүрэн өнгөрүүллээ.

            Цасны баяр бие халаалт, уулын алхалтаар эхэлж, чарганы уралдаан, буухиа тэмцээнээр үргэлжилсэн юм. Чарганы уралдааны тэргүүн байрт Стратеги, хөгжлийн бодлогын газар буюу Хөгжлийн хэлтэс, Байгаль орчин, ногоон хөгжлийн хэлтэс, Үйлдвэрлэл, технологийн парк төслийн нэгж, Ногоон хөгжил төслийн нэгжийн хамтарсан баг, дэд байрт: Захиргаа, удирдлага, санхүүгийн газар буюу Бүтээмж хариуцсан ахлах шинжээч, Дотоод хяналт, мониторингийн хэлтэс, Гадаад харилцаа, экспортын хэлтэс, Хүний нөөц захиргааны хэлтсийн хамтарсан баг, гутгаар байрт Захиалагчийн хяналт хариуцсан ахлах шинжээчийн баг буюу Санхүү, нягтлан бодох бүртгэлийн хэлтэс, Эдийн засгийн хэлтэс, Улаанбаатар дахь Төлөөлөгчийн газрын хамтарсан баг хугацаагаар хошуучилж шалгарлаа.

Харин Буухиа тэмцээнд Захиргаа, удирдлага, санхүүгийн газрын баг түрүүлж, Хөрөнгө оруулалт, худалдан авах ажиллагааны бодлогын газрын баг буюу Бараа материал худалдан авах ажиллагааны хэлтэс, Ажил үйлчилгээ худалдан авах ажиллагааны хэлтэс, Зах зээлийн судалгаа, маркетингийн хэлтэс хоёрдугаар байр, Стратеги, хөгжлийн бодлогын газрын хамтарсан баг гуравдугаар байр эзлэв.

Ерөнхий захиргааны ажилтнууд ийнхүү зургаан багт хуваагдан бүтэн жилийн турш спорт, урлагийн олон төрөлт тэмцээнээр өрсөлдөж, оны эцэст нийлбэр дүнгээр “Шилдэг баг” тодрох юм.