“Эрдэнэт” үйлдвэрийн ажилтнуудаас бүрдсэн уулчдын баг 2026 оны хоёрдугаар сарын 7-ны өдөр Хэнтийн нурууны ноён оргил Асралт хайрханд амжилттай гарлаа. Авиралтыг Авто тээврийн цехийн Уул уурхайн тээврийн технологийн хэсгийн БелАЗын жолооч, уулын спортын мастер Р.Түвшинтөр ахалж, багийн бүрэлдэхүүнд Засвар механикийн заводын Хайлах хэсгийн хийн зүсэгч, уулын спортын мастер Р.Түвшинбаяр, Эрүүл мэнд, сэтгэлзүйн төвийн сэтгэл засалч эмч Б.Хишигжаргал, Дулааны цахилгаан станцын цахилгааны хэсгийн цахилгааны засварчин Б.Батжаргал, мөн Б.Жаргалнэмэх нар оролцсон байна. Багийн гишүүд оргилд амжилттай хүрсний дараа уулын спортын мастер Р.Түвшинтөр, Р.Түвшинбаяр нар уулын цанаар аюулгүй, мэргэжлийн түвшинд бууж, авиралтаа амжилттай өндөрлүүлсэн ажээ. Дашрамд сонирхуулахад Асралт хайрхан уул нь Хэнтий аймгийн Батширээт сумын нутагт орших, Хэнтийн нурууны хамгийн өндөр оргил бөгөөд далайн түвшнээс дээш 2799 метрийн өндөрт сүндэрлэдэг. Байгалийн өвөрмөц тогтоц, түүх соёлын гүн утга агуулгаараа Монгол орны чухал бүс нутгийн нэгэнд зүй ёсоор тооцогддог энэхүү хайрхан нь монголчуудын хувьд эртнээс нааш ариун дагшин хэмээн шүтэгдэж ирсэн юм. Тус уул нь Хэнтийн нурууны төв хэсэгт, тайгын бүсэд багтах бөгөөд уул, ой, гол мөрөн хосолсон унаган байгальтай. Онон голын эх ундаргын сав газарт хамаарах уг бүс нутагт шинэс, гацуур, хуш зэрэг шилмүүст ой зонхилж, буга, хандгай, бор гөрөөс, баавгай зэрэг зэрлэг амьтад нутагладаг. Уур амьсгалын хувьд өвөлдөө -30 хэм хүртэл хүйтэрч, зундаа +15 хэм орчим сэрүүхэн байдаг.
Нар минутад мандаж минутад жаргана.
Үс засуулвал: 
Суудал: 
