-Эрдэнэт үйлдвэрийн удирдах ажилтны 2026 оны нэгдүгээр сарын 26-ны ээлжит шуурхай зөвлөгөөнийг Ерөнхий инженер Т.Батмөнх удирдлаа. Өнгөрсөн долоо хоногт үйлдвэрийн хэмжээнд Хөдөлмөрийн аюулгүй байдал, эрүүл ахуйн чиглэлээр үйл ажиллагаа хэвийн үргэлжилж, ажилтнуудад хувийн хамгаалах хэрэгслийг хуваарийн дагуу олгож ажилласан байна. Өндөр эрсдэлтэй 21, галын аюулгүй байдлын 5 ажил гүйцэтгэж, бүтцийн нэгжүүдэд удирдамжийн дагуу зорилтот хяналт шалгалт хийжээ. Нийт 192 хэмжилт хийснээс зөвшөөрөгдөх хэмжээнээс хэтэрсэн зөрчил илрээгүй байна. Түүнчлэн Эрдэнэт цогцолбор их сургууль дээр 220, ажлын байран дээр 180, гаднын 118, нийт 518 ажилтан сургалтад хамрагдсан талаар ХАБЭАХ-ээс мэдээллээ. Мөн Геологи хайгуулын экспедицийн ажилчдын хоолны газрын засвар дуусч ашиглалтад оржээ.
-Байгаль орчны чиглэлээр өнгөрсөн 7 хоногт хэвийн ажиллаж, Орхон аймгийн Засаг даргын Тамгын газар, “Эрдэнэт үйлдвэр” ТӨҮГ хамтран хэрэгжүүлж буй “Цагаан тоосны дэгдэлт, сөрөг нөлөөллийг бууруулах” хөтөлбөрийн 2025 оны хэрэгжилтийг Орхон аймгийн Иргэдийн төлөөлөгчдийн хурлаар хэлэлцүүлж, 92.3 хувийн үнэлгээ авчээ. Мөн аймгийн Засаг дарга цагаан тоосны бүсэд байрлах Говил, Баянцагаан баг, Жаргалант сумын иргэдтэй уулзалт хийж, холбогдох асуултад хариулт өгсөн байна.
-Үйлдвэрлэл, техникийн хэлтсээс өмнөх шуурхайн үүрэг даалгаврын биелэлтийг танилцуулж, уулын цул гаргалт, хөрс хуулалт, хүдэр дамжуулалт болон үйлдвэрлэлийн үндсэн үзүүлэлтүүд төлөвлөгөөний дагуу биелж байгааг мэдээллээ.
-Хүний нөөц, захиргааны хэлтсээс 2026 оны 2 дугаар сарын 15-ны дотор албан тушаалтнууд Хөрөнгө, орлогын мэдүүлгээ хуулийн хугацаанд өгөхийг сануулж, өнөөдрийн байдлаар 20 удирдах ажилтан ХОМ-гээ бөглөсөн байгааг дурдлаа. Мөн Ерөнхий захирлын 2026 оны нэгдүгээр сарын 19-ний өдрийн 25 дугаар тушаалаар зохион байгуулалтын өөрчлөлтөд орсон бүтцийн нэгжүүдийн үйл ажиллагааны журам, ажлын байрны тодорхойлолт, хөдөлмөрийн гэрээг шинэчлэн батлах хуваарийг Ерөнхий инженерээр батлуулсан бөгөөд 4 дүгээр сарын 23-ны дотор холбогдох баримт бичгүүдийг шинэчлэн танилцуулах үүргийг Хуулийн хэлтэс, Эдийн засгийн хэлтэст өгсөн талаар мэдээллээ. Мөн энэ долоо хоногт нийслэлийн архивын удирдлагууд Эрдэнэт үйлдвэрт ажиллаж, Төрөлжсөн архивын барилгын бүтээн байгуулалттай танилцах ажээ.
Шуурхайн төгсгөлд өгсөн үүрэг, чиглэл
Ерөнхий инженер Т.Батмөнх:
-Үндсэн тоног төхөөрөмжүүдийн засвар, ашиглалтын графикт уялдаа холбоотой зохицуулалт хийж, үйлдвэрлэлийн гарцыг нэмэгдүүлэх, цахилгааны хязгаарлалт үүсэж болзошгүй нөхцөлд зогсолт, тасалдлын үеийн бэлэн байдлын горим, графикийг холбогдох хэлтсүүд хамтран боловсруулж батлуулахыг үүрэг болголоо.
-Мөн ажилчдын автобусны цагийн хуваарьт өөрчлөлт оруулахдаа урьдчилан хэлэлцэж, шийдвэрийг шат дараатай хэрэгжүүлэх, ажилтнуудад мэдээллийг хангалттай өгөхийг анхаарууллаа. Их зогсолт, засварын ажлын үед хүний нөөцийн зохицуулалтыг оновчтой хийж, гол мэргэжлийн ажилтнуудын ээлжийн амралтыг тохируулах шаардлагатайг дурдав.
-Технологийн нормчлогдсон материалын нөөц бүрдүүлэлт, хэрэгцээтэй чухал материалын худалдан авалтыг хуулийн хүрээнд шуурхай шийдвэрлэхэд анхаарахыг холбогдох нэгжүүдэд үүрэг болголоо.
“Эрдэнэт үйлдвэр” ТӨҮГ-ын Ерөнхий захирал Г.Ёндон:
-Зэсийн үнэ өссөнтэй холбогдуулан борлуулалтын орлогыг нэмэгдүүлэх зорилгоор үлдэгдэл баяжмалыг (10–11 мян.тн) шуурхай ачих, вагон хангалтыг тасралтгүй зохион байгуулах шаардлагатайг онцоллоо.
-Ойрын хугацаанд Засгийн газарт илгээх танилцуулгыг үйлдвэрлэл, эдийн засгийн үндсэн үзүүлэлт, 2025 оны онцлох үйл явдлыг багтаасан цөөн, тодорхой байдлаар бэлтгэх чиглэл өглөө. Мөн төрийн өмчит үйлдвэрийн газрын ойрын 5 жилийн хөгжлийн төлөвлөгөө, мөнгөн урсгалын төсөөллийг бодит тооцоололд тулгуурлан дахин боловсруулж ирүүлэхийг үүрэг болголоо.
-Хөрөнгө оруулалтын томоохон төслүүдийн эдийн засгийн үр ашиг, нөхөх хугацаа, үйлдвэрлэлд үзүүлэх нөлөөллийг тодорхой тусгаж, үйлдвэрлэл, эдийн засгийн талаас нарийвчлан дахин хянах шаардлагатайг онцлов. Түүнчлэн борлуулалтын орлогын 1 хувийг нийгмийн чиглэлийн төсөлд зарцуулахтай холбоотой хууль, татварын зохицуулалтын хэрэгжилтийг судалж, санал дүгнэлт боловсруулахыг чиглэл болголоо.
Нар минутад мандаж минутад жаргана.
Үс засуулвал: 
Суудал: 
