“Эрдэнэт үйлдвэр” ТӨҮГ-ын дэргэдэх, ШУТИС-ийн харьяа, Ш.Отгонбилэгийн нэрэмжит “Эрдэнэт цогцолбор” их сургуулийн 2025–2026 оны хичээлийн жилийн намрын улирлын 27 дахь төгсөлтийн “Эрдмийн баяр” өнөөдөр ёслол төгөлдөр боллоо.
Эрдмийн баярт “Эрдэнэт үйлдвэр” ТӨҮГ-ын Ерөнхий захирал, доктор (Ph.D) Г.Ёндон, Монгол Улсын Гавьяат уурхайчин, ШУТИС-ийн профессор, доктор (Ph.D) Ж.Баатархүү, Хүний нөөц, захиргааны хэлтсийн дарга, доктор (Ph.D) О.Отгонбаяр, “Эрдэнэт цогцолбор” их сургуулийн захирал, доктор (Ph.D) Д.Заяабаатар, Сургалтын албаны дарга, доктор (Ph.D) Д.Болор-Эрдэнэ болон эрдэмтэн багш нар, төгсөгчид, тэдний гэр бүл, найз нөхөд оролцлоо.
Энэ удаагийн төгсөлтөөр тус сургуулийг дөрвөн мэргэжлээр магистрын зэрэгтэй 13, бакалаврын зэрэгтэй 23 оюутан амжилттай төгсөж, ромбо, дипломоо гардан авсан юм.
Ёслолын үеэр “Эрдэнэт үйлдвэр” ТӨҮГ-ын Ерөнхий захирал Г.Ёндон нийт төгсөгчдөд баяр хүргэж үг хэлэхдээ, “Монгол Улсын хөгжил, ялангуяа Эрдэнэт үйлдвэрийн Үйлдвэрлэл, технологийн паркийн хүрээнд хэрэгжих зэс, молибдены баяжмал боловсруулах, зэс утас, кабель, нано нунтгийн үйлдвэр зэрэг томоохон бүтээн байгуулалтад инженер, мэргэжилтнүүдийн мэдлэг, ур чадвар урьд урьдаас илүү чухал болж байна. Уул уурхайн салбар өнөөдөр Монгол Улсын эдийн засгийн тулгуур, хөгжлийн чиг хандлагыг тодорхойлогч салбар болсон энэ цаг үед та бүхэн бахархалтайгаар энэ мэргэжлийг эзэмшиж байна” гэлээ.
Мөн “Эрдэнэт цогцолбор” их сургуулийн захирал Д.Заяабаатар, “Манай сургууль үйлдвэрлэлд суурилсан сургалт, бодит дадлагаар дамжуулан, салбартаа шууд ажиллах чадвартай мэргэжилтэн бэлтгэх зорилготой. Энэ удаагийн төгсөгчид ч мөн шинжлэх ухаанд суурилсан мэдлэг, ёс зүйтэй хандлагаараа улс, салбарынхаа хөгжилд үнэтэй хувь нэмэр оруулна гэдэгт итгэлтэй байна” хэмээн онцолсон юм.
Төгсөгчдийн төлөөлөл болсон ШУТИС-ийн Уул уурхайн ашиглалт мэргэжлийн төгсөгч Мягмардоржийн Нямдаваа сэтгэгдлээ хуваалцахдаа, “Өнөөдөр бид олон жилийн хөдөлмөр, хичээл зүтгэлийнхээ үр шимийг хүртэж байна. Багш нар маань бидэнд зөвхөн мэргэжлийн мэдлэг олгоод зогсохгүй, зөв иргэн байх, эх орондоо хэрэгтэй хүн болох, хөдөлмөрийн үнэ цэнийг ойлгуулж сургасан. Оюутан байх хугацаанд гаргасан алдаа, сурсан туршлага маань амьдралын их замд гарахад биднийг бэлтгэсэн гэж бодож байна” гэлээ.
Ийнхүү “Эрдэнэт цогцолбор” их сургуулийн 2025–2026 оны хичээлийн жилийн намрын улирлын 27 дахь төгсөлт амжилт, бахархал дүүрэн болж, үйлдвэрлэл, шинжлэх ухаанд суурилсан мэдлэгтэй шинэ үеийн мэргэжилтнүүд эх орныхоо хөгжилд хувь нэмэр оруулах гараагаа эхлүүллээ.
Нар минутад мандаж минутад жаргана.
Үс засуулвал: 
Суудал: 
