“Эрдэнэт үйлдвэр” ТӨҮГ-ын Эмэгтэйчүүдийн холбоо үүсэн байгуулагдсаны 25 жилийн ой энэ онд тохиож байна. Түүхэн ойг угтан тус холбооны тэргүүлэгчид Эмэгтэйчүүдийн анхан шатны нэгжийн дарга нартай уулзалт зохион байгуулж, ойн хүрээнд хэрэгжүүлэхээр төлөвлөсөн ажлуудаа танилцуулан, санал бодлыг нь сонслоо.
Эмэгтэйчүүдийн холбооноос эмэгтэйчүүдийн нийтлэг эрх ашиг, сонирхолд чиглэсэн, нийгэм, гэр бүлийн сайн сайхны төлөөх нөлөөллийн үйл ажиллагаа, манлайлал, сургалтын хөтөлбөр зэрэг олон талт, ач холбогдол бүхий томоохон ажлуудыг 2026 онд хэрэгжүүлэхээр төлөвлөжээ. Мөн “Олон улсын эмэгтэйчүүдийн эрхийг хамгаалах өдөр”-ийг тохиолдуулан тус холбооны 25 жилийн ойн баярыг өргөн хүрээтэй тэмдэглэх бэлтгэл хангаж буйгаа энэ үеэр онцолсон юм.
Ойн хүрээнд Эмэгтэйчүүдийн холбооноос анхан шатны бүтцийн нэгжүүдийн дунд 25 бүтээлч ажил өрнүүлэх уралдаан зарлаад байна. Түүнчлэн, “Эрдэнэт” телевиз, “Эрдэнэт долгион” ФМ-107,1 радиотой хамтран “Уурхайчин бүсгүйчүүд” цуврал подкаст бэлтгэн үзэгч, сонсогчдод хүргэх, Эрдэнэт үйлдвэрийн эмэгтэйчүүдийн түүхэн замналыг харуулсан гэрэл зургийн цомог, эмхэтгэл хэвлүүлэхээр төлөвлөжээ. Үүнээс гадна “Ном унших цаг”, “Ханийн бэлэг” чаллэнж зэрэг соён гэгээрүүлэх, гэр бүлд чиглэсэн олон сонирхолтой үйл ажиллагааг эмэгтэйчүүд хамтран зохион байгуулах юм.
Өнгөрсөн онд Дэлхийн гэр бүлийн өдрийг тохиолдуулан Эмэгтэйчүүдийн холбоо хөгжлийн бэрхшээлтэй, байнгын асаргаанд байдаг хүүхэдтэй ажилтнуудынхаа гэр бүлд чиглэсэн сэтгэл зүйн дэмжлэг, сэргээн засах тусламж үйлчилгээний цогц үйл ажиллагааг амжилттай зохион байгуулсан. Хүүхдийн сэргээн засах судлалын Монголын нийгэмлэг, Анагаахын шинжлэх ухааны үндэсний их сургууль, Монгол-Японы эмнэлгийн эмч, багш нар Эрдэнэтэд ажиллаж, хөгжлийн бэрхшээлтэй хүүхдүүдэд яс булчингийн хэт авиан оношилгоо, эмчилгээ хийж, хөдөлгөөн заслын тусламж үйлчилгээ үзүүлсэн юм.
Өчигдөр болсон уулзалтын үеэр Дулааны цахилгаан станцын нэгэн ажилтан, энэхүү үйл ажиллагааг санаачлан зохион байгуулсан Эмэгтэйчүүдийн холбооны Тэргүүлэгч Б.Алгирмаад чин сэтгэлийн талархал илэрхийлж, гарын бэлэг гардууллаа. Тэрбээр хөгжлийн ялгаатай хүүхдийнх нь биеийн байдал тухайн эмчилгээ, сэргээн засах үйлчилгээнээс хойш эрс сайжирсныг онцлон, эмчилгээний чиглэлийг зөв тодорхойлоход бодитой дэмжлэг үзүүлсэнд талархаж явдгаа илэрхийлсэн юм.
Нар минутад мандаж минутад жаргана.
Үс засуулвал: 
Суудал: 
