“Эрдэнэт үйлдвэр” ТӨҮГ-ын удирдах ажилтны даваа гаргийн ээлжит шуурхай зөвлөгөөн өнөөдөр боллоо. Зөвлөгөөнийг Ерөнхий инженер Т.Батмөнх удирдан явуулсан. Өнгөрсөн долоо хоногт үйлдвэрийн газрын хэмжээнд хөдөлмөрийн эрүүл мэнд, аюулгүй байдлын чиглэлээр хэвийн ажилласныг шуурхайн эхэнд мэдээллээ. Мөн гэмт хэрэг зөрчилгүй, галын дуудлагагүй ажилласан байна. Хувийн хамгаалах хэрэгсэл хуваарийн дагуу хэвийн олгогдож, хөдөлмөрийн эрүүл мэнд, аюулгүй байдлын нийт ажилтны сургалт “Эрдэнэт цогцолбор” дээд сургууль болон ажлын байранд зохион байгуулагдлаа. Эрдэнэт үйлдвэрийн Ерөнхий захиргааны нэгдүгээр байрны ажилчдын халуун хоолны танхимын засвар дууссан, ашиглалтад ороход мэргэжлийн байгууллагын дүгнэлт хүлээгдэж байгааг Хөдөлмөрийн аюулгүй байдал, эрүүл ахуйн хэлтсээс мэдээллээ. Энэ сарын 12-ны өдөр “Нэн түрүүнд ХАБ-2025” бага хурал зохион байгуулагдаж, Эрдэнэт үйлдвэр хөдөлмөрийн эрүүл мэнд, аюулгүй байдлын чиглэлээр энэ онд хийж хэрэгжүүлсэн ажлаа дүгнэнэ. Үүнтэй холбогдуулан, үйлдвэрийн газрын бүтцийн нэгжүүдээс цахимаар санал авч байгаа тул идэвхтэй оролцохыг шуурхай зөвлөгөөнд мэдээллээ.
Өнгөрсөн долоо хоногт үйлдвэрлэл, технологийн горим хэвийн ажилласныг үйлдвэрлэлийн цехүүд танилцууллаа. Нормчлогдсон материалын нөөц, үйлдвэрлэлийн төлөвлөгөөний биелэлтийн талаар Үйлдвэрлэл, техникийн хэлтсийн дарга Т.Түмэн-Өлзий мэдээлэл хийлээ. Эрдэнэт үйлдвэрийн цех, нэгжүүд намар, өвлийн бэлтгэл ажлаа хангаж, ажилтнууд эрүүл мэндийн 2025 оны урьдчилан сэргийлэх үзлэгт хамрагдаж дуусаж байна.
Томуугийн халдварын өнөөгийн нөхцөл байдал, хариу авах арга хэмжээний талаар Орхон аймгийн Онцгой комисс хуралдаж, бүх шатны боловсролын байгууллагын хэмжээнд урлаг, соёлын нийтийг хамарсан үйл ажиллагаа зохион байгуулахгүй байх шийдвэр гарсныг Ерөнхий инженер Т.Батмөнх танилцуулж, биелэлтийг хангаж ажиллахыг холбогдох бүтцийн нэгжүүдэд үүрэг болголоо. Ажилтнуудын орон сууцны нэг удаагийн дэмжлэг авах хүсэлтийг энэ сарын 15-ны дотор Нийгмийн харилцааны хэлтэст ирүүлэхийг шуурхай зөвлөгөөнд мэдээлсэн. Эрхүүгийн техникийн их сургуульд уул уурхайн мэргэжлээр, ОХУ-ын тэтгэлгээр суралцах 10 ажилтныг сонгон шалгаруулах хэлний шалгалтыг өнгөрсөн долоо хоногт зохион байгуулсныг Хүний нөөц, захиргааны хэлтэс мэдээллээ. Тус шалгаруулалтад нийт 23 ажилтан оролцсон байна.
Дэлхийн зах зээлд зэсийн баяжмалын үнэ нэмэгдэж, уурхайчид 2025 оны үйлдвэрлэлийн төлөвлөгөөт үзүүлэлтүүдээ амжилттай биелүүлэн ажиллаж байгааг Ерөнхий захирал Г.Ёндон шуурхай зөвлөгөөнд онцлоод, хамт олондоо баяр хүргэж, цаг үеийн асуудлаар үүрэг даалгавар өглөө.
Нар минутад мандаж минутад жаргана.
Үс засуулвал: 
Суудал: 
