Өвлийн тэргүүн сарын шинийн нэгэн, Чингис хааны мэндэлсэн хүндэт өдөр Эрдэнэт хотын соёл, урлагийн амьдралд шинэ хуудас нээгдлээ. Монгол Улсын Урчуудын эвлэлийн шагналт, Монгол Улсын Соёлын тэргүүний ажилтан Лувсангийн Төмөр агсны нэрэмжит “Уран зургийн галерей” ёслол төгөлдөр нээлтээ хийв.
Нээлтийн ажиллагаанд уран бүтээлчийн үр хүүхэд, төрөл төрөгсөд, түүний хамтран зүтгэгчид, үе үеийн зураач, урчуудын төлөөлөл хүрэлцэн ирж, агуу уран бүтээлчийн авьяас, хөдөлмөрийг хүндэтгэлтэйгээр дурслаа.
Л.Төмөр агсны уран бүтээлийн гол онцлог нь монгол ахуй, байгаль дэлхий, хүний дотоод ертөнцийг ур хийц, хүчтэй мэдрэмжээр илэрхийлдэгт оршино. Тэрбээр төмөр, чулуу, мод, шил зэрэг олон төрлийн материал дээр бүтээл туурвидаг, уран сэтгэмжтэй, олон талын авьяастай урчуудын нэг байв. Тэрээр Эрдэнэт үйлдвэрийн эхэн үеийн бүтээн байгуулалтад гар бие оролцож, хотын өнгө төрхийг тодорхойлсон баримал, уран хийцийн бүтээлийн зураг төсөл, хийц загваруудыг урлаж байжээ. Мөн Дарханд хэрэгжсэн “Хэнтийн ухаа”, Монгол–Оросын найрамдлын хүрээнд хийгдсэн томоохон бүтээн байгуулалтын баримлын ажилд оролцсон нь түүний уран бүтээлчийн замналыг улам тодотгож байдаг.
Галерейн нээлтийн үеэр түүний үр хүүхдүүд 2012 онд ээжийнхээ аавд нь зориулан бичсэн шүлгийг 13 жилийн дараа уншиж, зочдын сэтгэлд дулаан уур амьсгал төрүүллээ. Мөн Соёлын тэргүүний ажилтан Б.Энхболд морин хуурын аялгуугаар зочдыг угтан, нээлтийн үйл ажиллагааг уянгалаг, монгол уламжлалт өнгө аястай болгов.
Л.Төмөр агсны уран бүтээлийн дээжсийг нэг дор багтаасан энэхүү галерей нь түүний өвийг хадгалах, олон нийтэд сурталчлах, залуу уран бүтээлчдэд урам зориг өгөх чухал соёлын орон зай болж байна.
Нар минутад мандаж минутад жаргана.
Үс засуулвал: 
Суудал: 
