Монголын Үндэсний Дотоод Аудиторын Холбоо нь Олон Улсын Дотоод Аудиторуудын Институт (IIA)-ын Монгол Улс дахь албан ёсны, цорын ганц салбар байгууллага бөгөөд жил бүр үндэсний хэмжээнд дотоод аудитын нэгж, аудиторуудыг нэгтгэсэн “Дотоод аудиторуудын форум”-ыг зохион байгуулж, тухайн жилд салбартаа манлайлсан, салбарын нэр хүндийг өсгөхөд үнэтэй хувь нэмэр оруулсан дотоод аудитын шилдэг нэгж, дотоод аудиторыг шалгаруулдаг уламжлалтай.
Энэ удаагийн “ANNUAL CONFERENCE 2025” буюу дотоод аудиторуудын нэгдсэн форум “IA&AI” сэдвийн хүрээнд өнөөдөр амжилттай зохион байгуулагдаж байна. Форумд Монгол Улсын хэмжээнд Дотоод аудитын үйл ажиллагаа явуулж буй 130 байгууллагын 450 гаруй мэргэжил нэгтнүүд чуулж, “Эрдэнэт үйлдвэр” ТӨҮГ-ын Дотоод хяналт, мониторингийн хэлтэс Монгол Улсын 2025 оны “Дотоод Аудитын Шилдэг нэгж” номинацийн эзэн боллоо.
Эрдэнэт үйлдвэрийн Дотоод хяналт, мониторингийн хэлтэс нь 2025 онд үйлдвэрийн газарт эрсдэлийн соёл, дотоод хяналт шалгалтын тогтолцоог төлөвшүүлэх, хөгжүүлэх, нэгдсэн менежментийн тогтолцоог бий болгоход чиглэсэн үр дүнтэй, томоохон ажлуудыг үйлдвэрийн газар төдийгүй, улсын хэмжээнд амжилттай зохион байгуулж, дотоод аудитын хөгжилд бодитой хувь нэмэр оруулж ажилласан юм. Тухайлбал, “Хамтын хөгжил - Сайн туршлага” улсын хэмжээний нэгдсэн зөвлөгөөн, эрдэмтэн судлаачдын дунд эрдэм шинжилгээний хурал, оюутнуудын дунд эсээ бичлэгийн уралдаан, ЕБС-ийн сурагчдад эрсдэл, дотоод хяналтын танин мэдэхүйн сургалт, үйлдвэрийн ажилтнуудын дунд тэднийг хөгжүүлэхэд чиглэсэн сургалт, танин мэдэхүйн тэмцээн уралдаан, салбарын хэмжээнд эрсдэл, дотоод аудитын үр нөлөө, ач холбогдлыг таниулахад чиглэсэн сургалт, сурталчилгаа, нөлөөллийн үйл ажиллагаа зохион байгуулах, эрсдэлийн нэгдсэн удирдлага, дотоод хяналтын тогтолцоонд нэвтрүүлсэн туршлагаа салбарын хамт олондоо хуваалцах, түгээх, мэдлэг бүтээхэд чиглэсэн олон ажлуудыг хэрэгжүүлсэн байна.
Энэ удаагийн Дотоод аудиторуудын форумаар дэлхий даяар байгууллагууд дижитал шилжилтэд суурилсан үйл ажиллагааны загварчлалыг бий болгох, тэр дундаа хиймэл оюуныг үйл ажиллагаандаа нэвтрүүлж ашиглаж эхэлсэн нь дотоод аудитын салбарт ч хувьсгал хийх нөхцөлийг бүрдүүлж дотоод аудиторуудын мэргэжлийн ур чадварт шинэчлэл хийх шаардлага урган гарч буйг онцлов. Мөн хиймэл оюун ашиглах, өгөгдлийн нууцлал, ёс зүй, хяналтын хариуцлага, тэдгээртэй холбоотой эрсдэлийг удирдах, зохицуулах орчныг ойлгох хэрэгцээ бий болж байгааг хэлэлцлээ.
Иймээс энэ жилийн форум нь дотоод аудитын чиг хандлага, шилдэг туршлага, инновац болон AI ашиглалтын кейсүүдийг танилцуулах, харилцан суралцах талбар болж, дотоод аудитын салбарын хөгжлийн нэгэн томоохон мөчийг хамтдаа бүтээснээрээ өндөр ач холбогдолтой болж байна.
Дотоод хяналт, мониторингийн хэлтэс 2025 оны ажлаараа ийнхүү манлайлсан нь “Эрдэнэт үйлдвэр” ТӨҮГ-ын удирдлага, хамт олон, уурхайчдын хамтын хүч, итгэл зүтгэлийн үр дүн бөгөөд хамтран ажилласан бүтцийн нэгжүүд, хамт олондоо талархал илэрхийлж буйгаа уламжиллаа.
Нар минутад мандаж минутад жаргана.
Үс засуулвал: 
Суудал: 
