Удирдах ажилтны шуурхай зөвлөгөөний тойм

“Эрдэнэт үйлдвэр” ТӨҮГ-ын удирдах ажилтны даваа гаргийн ээлжит шуурхай зөвлөгөөн боллоо. Зөвлөгөөнийг Үйлдвэрлэл, техникийн бодлогын газрын дарга П.Батболор удирдан явуулсан. Өнгөрсөн долоо хоногт үйлдвэрийн газрын хэмжээнд хөдөлмөрийн эрүүл мэнд, аюулгүй байдлын чиглэлээр хэвийн ажилласныг шуурхайн эхэнд мэдээллээ. Өндөр эрсдэлтэй 21 ажил гүйцэтгэж, хөдөлмөрийн нөхцөлийн сөрөг хүчин зүйлийн 69 хэмжилт хийхэд зөвшөөрөгдөх дээд хэмжээ хэтэрсэн зургаан тохиолдол гарсан тул холбогдох бүтцийн нэгжид зөвлөмж өгч ажилласан байна. Энэ сарын 11-ний өдөр Эрдэнэт үйлдвэрийн Орос 19 дүгээр сургууль, Дотоодын цэргийн 816 дугаар анги хамтран тус сургуулийн 6-аас 12 дугаар ангийн 300 сурагчийг хамруулан “Үе тэнгийн дээрэлхэлт, түүнээс урьдчилан сэргийлэх нь”, “Гэмт хэрэг, зөрчлийн тухай ойлголт” сэдэвт сургалт зохион байгуулсныг Хөдөлмөрийн аюулгүй байдал, эрүүл ахуйн хэлтсээс мэдээллээ. “Эрдэнэт үйлдвэр” ТӨҮГ-ын байгаль орчны менежментийн 2025 оны төлөвлөгөөний биелэлтийг Орхон аймгийн Засаг даргын захирамжаар байгуулагдсан ажлын хэсэгт танилцуулж, 94,6 хувьтай үнэлсэн байна. Байгаль орчны менежментийн 2026 оны төлөвлөгөө боловсруулж байгааг Байгаль орчин, ногоон хөгжлийн хэлтсээс мэдээллээ. 
Өнгөрсөн долоо хоногт үйлдвэрлэл, технологийн горим хэвийн ажилласныг үйлдвэрлэлийн цехүүд танилцууллаа. Дутагдалтай байгаа нормчлогдсон материалын нөөц, үйлдвэрлэлийн сарын эхний 16 хоногийн төлөвлөгөөний талаар Үйлдвэрлэл, техникийн хэлтсийн дарга Т.Түмэн-Өлзий мэдээлэл хийлээ. Эрдэнэт үйлдвэрийн цех, нэгжүүд намар, өвлийн бэлтгэл ажлаа хангаж, ажилтнууд 2025 оны эрүүл мэндийн урьдчилан сэргийлэх үзлэгт хамрагдаж байна. Үйлдвэрийн газрын хэмжээнд галын автомат дохиоллын нэгдсэн системд шалгалт хийж дууссан, гэж Холбоо, мэдээллийн технологи, автоматжуулалтын цехээс мэдээлсэн. Мөн галын аюултай тохиолдол гарч байгаа тул цех, нэгжүүд бүх түвшинд байнгын анхаарал, сэрэмжтэй ажиллахыг санууллаа. 
Жилийн эцсийн эргэлтийн хөрөнгийн тооллого дуусаж, үндсэн хөрөнгийн тооллого эхэлсэн байна. Шинээр байгуулах хаягдлын аж ахуйд хяналтын цооног өрөмдөж, үйлдвэрлэлийн төлөвлөгөөт засвар хугацаандаа хийгдэж байна. Технологийн нормчлогдсон материал нөөц бүрдүүлэх, зэсийн баяжмал ачилтын хоцрогдол арилгах, төмөр замын тээврийн зохицуулалт хийж ажиллахыг холбогдох бүтцийн нэгжүүдэд үүрэг болголоо.