Аж ахуй, үйлчилгээний цехийн ажилтнуудад шагналын хур буулаа

Аж ахуй, үйлчилгээний цехийн түүхт 50 жилийн ойн баярын хурал, хүндэтгэл, ёслолын үйл ажиллагаа өнгөрсөн баасан гарагт Соёл, урлагийн цогцолборын их танхимд боллоо. Баярын хуралд Төр, засгийн үйлчилгээ эрхлэх газрын дарга Ж.Тамир, Захиргааны хэлтсийн дарга Д.Уртнасан, Орхон аймгийн ИТХ-ын нарийн бичгийн дарга Ш.Ганболд, ЗДТГ-ын Төрийн захиргаа, удирдлагын хэлтсийн дарга М.Жанболат, “Эрдэнэт үйлдвэр” ТӨҮГ-ын Захиргаа, удирдлага, санхүүгийн газрын дарга Д.Баярбат, Нийгмийн харилцааны хэлтсийн дарга Д.Өнөбат, Хүний нөөц, захиргааны хэлтсийн дарга О.Отгонбаяр болон газар, хэлтэс, цехийн дарга нар, уурхайчдын төлөөлөл оролцож, Аж ахуй, үйлчилгээний цехийн хамт олонд баяр хүргэв. 
Энэ үеэр, хагас зуун жилийн түүх бүтээсэн хамт олонд шагналын хур буусан юм. Эрдэнэт үйлдвэрт олон жил үр бүтээлтэй ажиллаж, бүтээн байгуулалт, хөгжил дэвшилд үнэтэй хувь нэмэр оруулсан Аж ахуй, үйлчилгээний цехийн дарга асан М.Долгормаа “Эрдэнэт дээд өргөмжлөл” медалиар шагнуулсан бол Монгол Улсын Засгийн газрын шагнал “Тэргүүний уурхайчин” цол тэмдгээр Б.Нэргүй, С.Чанцалдулам, Ц.Гэрэлмаа, Б.Даваадулам, Н.Сүрэндулам, Д.Гантулга, Н.Саранчимэг, Н.Бат-Эрдэнэ, Н.Ариунбуян, А.Ариунбилэг, Д.Байгалмаа, Ш.Дэмчигмаа, Н.Булганцэцэг нар энгэрээ мялаалаа. 
Мөн Орхон аймгийн “Хүндэт тэмдэг”-ээр ажилтан Г.Цэрэндолгор, Б.Чанцалдулам, Ч.Энхтуяа, Ш.Нямжав, Д.Тунгалаг, А.Ундармаа, Ж.Өлзийбүрэн, Т.Жавзан нарыг шагнав. Харин үйлчилгээний Тэргүүлэх мэргэжилтэн Д.Амаржаргал “Иргэний төлөө” шагнал хүртлээ. Засгийн газрын шагнал “Нийтийн аж ахуйн тэргүүний ажилтан” цол, тэмдгээр Г.Чулуунцэцэг, З.Сувд-Эрдэнэ, О.Мөнхцэцэг, Н.Алтанцэцэг, Э.Улаангом, Төр, засгийн үйлчилгээг эрхлэх газрын “Хүндэт жуух бичиг”-ээр Ж.Энхтайван, П.Эрдэнэсайхан, Д.Нина, Г.Туяа, Ж.Цэвээн нар шагнуулсан юм. 
Харин тус цехийн ажилтан Г.Сувд, ахмад ажилтан Б.Оюунцэцэг нар Гэр бүл, хөдөлмөр, нийгмийн хамгааллын яамны “Тэргүүний ажилтан”, Э.Тогтохдаваа “Соёлын тэргүүний ажилтан” болсон бол Х.Заяахүү Монголын соёлын ажилтны “Соёлын түшиг” холбооны дээд шагнал “Соёлын гавьяа” шагнал хүртлээ.