НҮБ-ын Хөгжлийн хөтөлбөрийн “Интегра” санаачилгын хүрээнд хэрэгжиж буй “Шударга уул уурхай - Шинэ үе” сэдэвт төслийн хэлэлцүүлэг Эрдэнэт үйлдвэрийн ерөнхий захиргааны нэгдүгээр байранд боллоо. Энэхүү хэлэлцүүлгийг Монгол–Германы хамтарсан Ашигт малтмал, технологийн их сургууль (МГТИС), “Эрдэнэт үйлдвэр” ТӨҮГ хамтран зохион байгуулж, уул уурхайн салбарын ёс зүй, ил тод байдал, хариуцлагатай байдлын талаар санал бодлоо солилцов.
“Эрдэнэт үйлдвэр” ТӨҮГ-ын Ерөнхий захирал, доктор Г.Ёндон хэлэлцүүлгийг нээж хэлсэн үгэндээ, “Манай үйлдвэр НҮБ-ын Хөгжлийн хөтөлбөр болон салбарын байгууллагуудтай хамтран, шударга, хариуцлагатай уул уурхайг төлөвшүүлэхэд үргэлж дэмжлэг үзүүлж ирсэн. Ийм төрлийн төсөл, сургалт нь салбарын итгэлцлийг нэмэгдүүлж, залуу инженерүүдийн ёс зүйн төлөвшилд чухал хувь нэмэр оруулна” гэж онцоллоо.
Харин МГТИС-ийн ректор, доктор Б.Батцэнгэл хэлэхдээ, “Монгол Улсад уул уурхайн салбар авлига, ил тод бус байдлын эрсдэлтэй тулгарч буй тул ёс зүй, шударга хандлагыг шинэ үеийн залуучуудад төлөвшүүлэх шаардлагатай байна. Энэ төслийн зорилго нь уул уурхайн инженер, техникийн ажилтнуудын хандлагыг өөрчлөх, ёс зүйг боловсролын салбараар дамжуулан түгээх юм. Эрдэнэт үйлдвэртэй хамтран боловсруулсан сургалтын хөтөлбөрөө өнөөдөр танилцууллаа” хэмээв.
Тус төсөл нь 2025 оны долоодугаар сараас арванхоёрдугаар сарын хооронд хэрэгжиж байгаа бөгөөд уул уурхайн салбарын мэргэжилтнүүд, оюутнуудад чиглэсэн сургалт, симуляци, хэлэлцүүлгүүдийг зохион байгуулж байна.
Нар минутад мандаж минутад жаргана.
Үс засуулвал: 
Суудал: 
