Эрдэнэт үйлдвэр, цаашдын хөгжлийн ирээдүй, техник технологийн төсөл хөтөлбөрүүдийг хэрэгжүүлэн авч явах хүний нөөц, ажилтнууддаа оюуны хөрөнгө оруулалт хийж, бэлтгэх алсын хараатай бодлого баримтлан ажиллаж байна. Эдгээр бодлого хөтөлбөрийн нэг нь “Эрдэнэт үйлдвэр” ТӨҮГ-ын Хүний нөөц, захиргааны хэлтэс, “Talk Talk English” сургалтын байгууллагын хамтран хэрэгжүүлж буй англи хэлний ахисан түвшний сургалт юм. “Talk Talk English” англи хэлний сургалтад энэ жил тус үйлдвэрийн 39 ажилтан хамрагдаж, ахисан түвшний чадвар эзэмшиж байна. Тус сургалтын төв болон суралцагч ажилтнуудтай “Эрдэнэт үйлдвэр” ТӨҮГ-ын Ерөнхий захирал Г.Ёндон, Хүний нөөц, захиргааны хэлтсийн дарга О.Отгонбаяр нар уулзалт хийж, амжилт хүслээ.
“Эрдэнэт үйлдвэр” ТӨҮГ-ын үйл ажиллагаанд баримталдаг хоёр чухал бодлого бий. Эхнийх нь уурхайн нөөц баялгийг нэмэгдүүлэхийн тулд геологийн хайгуулын ажлыг эрчимжүүлэх, удаах нь ирээдүйн хөгжлийг тодорхойлох хүний нөөцөө бэлтгэж, сургаж бэлтгэхэд хөрөнгө оруулж байна. Өөрөөр хэлбэл, мэдлэг чадвартай сайн хүний нөөцтэй бол ямар ч дэвшилтэт технологийг нэвтрүүлж, нутагшуулж чадна. Тэр утгаараа ажилтнуудаа чадавхжуулж, гадаад хэлний мэдлэгийг дээшлүүлэх зорилгоор “Talk Talk English” сургалтын байгууллагатай хамтран, ажлын байран дээр нь англи хэлний ахисан түвшний сургалтад хамруулах хөтөлбөрийг хэрэгжүүлж байна. Энэ бол сургалтад хамрагдаж байгаа ажилтнууд зөвхөн англи хэлний мэдлэгээ ахиулаад зогсохгүй хувь хүний хөгжил, ахуй амьдралаа сайжруулахад ч олон талын өргөн боломж нээж өгнө гэдэгт итгэлтэй байгаагаа уулзалтын үеэр Ерөнхий захирал Г.Ёндон онцолсон.
Эрдэнэт үйлдвэрийн нийт ажиллах бүрэлдэхүүний 73 хувийг 45 хүртэлх насны ажилтнууд эзэлж байгаа бол тэдгээрийн 61 хувь буюу 4000 гаруй нь дээд боловсролтой ажилтнууд байна. Тэгвэл сүүлийн жилүүдэд олон жил ажиллаж буй дадлага туршлагатай ажилтнуудын тоо буурч, 5-6 дугаар зэрэгтэй туршлагатай ажилтан 179 болсон зэрэг хүний нөөцийн бүтэц, бүрэлдэхүүнд томоохон өөрчлөлт, шилжилт гарч байгаа учраас дараагийн үеийн хүний нөөцөө сургаж бэлтгэх зайлшгүй хэрэгцээ шаардлага урган гарсан. Тиймээс ажилтнуудаа олон талын мэргэжлийн сургалтуудад хамруулж байгаа бөгөөд эдгээрийн нэг нь энэхүү англи хэлний ахисан түвшний сургалт болж байна. 2022-2024 онд үйлдвэрийн 7 ажилтнаа техникийн англи хэлний ахисан түвшинд сургасан бол 2025 онд инженер техникийн ажилтнуудынхаа дунд нээлттэй сонгон шалгаруулалт зарлаж, 18 бүтцийн 39 ажилтныг “Talk Talk English” сургалтын төвийн ахисан түвшний сургалтад хамруулж байгаа зэрэг мэдээллийг Хүний нөөц, захиргааны хэлтсийн дарга О.Отгонбаяр танилцуулгадаа дурдлаа.
Уулзалтын үеэр “Talk Talk English” сургалтын байгууллагын бүтээгдэхүүн хөгжүүлэгч, багш Даниел Шэрин сургалтын агуулга хөтөлбөр, давуу талаа танилцуулж, суралцагч ажилтнуудын хэлний түвшин, хичээл чармайлтын талаар онцлов. Мөн англи хэлний ахисан түвшинд суралцаж буй ажилтнууд ажлын байрнаас хөндийрөхгүйгээр өдөр тутмын ажлаа гүйцэтгэхийн зэрэгцээ англи хэлний мэдлэгээ дээшлүүлж суралцах боломжийг олгож, цаашид илүү сайн мэргэжилтэн болон өсөж хөгжихөд оюуны хөрөнгө оруулалт хийж, дэмжиж байгаа Эрдэнэт үйлдвэрийн удирдлагууд болон англи хэлний чанартай, өгөөжтэй сургалт явуулдаг “Talk Talk English” сургалтын байгууллагын багш хамт олонд талархлаа илэрхийллээ.
Нар минутад мандаж минутад жаргана.
Үс засуулвал: 
Суудал: 
