Болзошгүй гамшиг, ослын үед хариу арга хэмжээг нэн даруй зохион байгуулах, ажиллагааны дарааллыг тогтоох, эрэн хайх, аврах, хор уршгийг арилгах, мэргэжлийн нийт ангийн ажилчид, албан хаагчдын бэлэн байдлыг дээшлүүлэх, бүтцийн нэгжүүд хоорондын хамтын ажиллагааг сайжруулах зорилгоор Ил уурхайн Өрөмдлөг тэсэлгээний хэсэг буюу Тэсрэх бодисын үйлдвэрт томоохон хэмжээний ослын үед ажиллах дадлага, сургууль хийлээ.
“2025 оны 10 дугаар сарын 29-ний өдрийн 10:29 цагт Тэсрэх бодисын үйлдвэрийн агуулахаас 20 тонн тэсрэх бодис ачиж явсан автомашин тоормосны систем ажиллагаагүй болсны улмаас тэсрэх бодис тээвэрлэх маршрутаас гарч, төмөр замын хэсэг рүү унаж, бензиний сав цоорсноос шаталт үүсэн ачиж явсан их хэмжээний тэсрэх бодис шатаж, хүчтэй тэсрэлт болсон. Жолооч, Дотоодын цэргийн нэг алба хаагч газар дээрээ амь эрсэдсэн, захиргааны байр дэлбэрэлтийн долгионд цохигдсоны улмаас хэсэгчлэн нурсан, цонхнууд хагарсан, барилга дотор ажиллаж байсан хоёр ажилчин нурангид дарагдсан. Хагарсан цонхны шилэнд гурван ажилтан оногдож, хүнд гэмтсэн, захиргааны байрны нэг давхрын цахилгаан сүлжээнд масс, шаталт үүссэн” гэсэн даалгавар-цагийн байдлын хүрээнд ажиллагааны дарааллыг тогтоож, эрэн хайх, аврах, хор уршгийг арилгах дадлага сургуулилт хийгдэв.
“Энэхүү, газар дээрх дадлага сургуулилт нь мэргэжлийн ангийн албан хаагчдын ур чадварыг сайжруулах, болзошгүй гамшиг ослын үед ажиллахад ямар алдаа дутагдал байгааг илрүүлэх, нийт бие бүрэлдэхүүнийг чадавхжуулах ач холбогдолтой” гэж Гэрээт Гал түймэр унтраах, аврах 058 дугаар ангийн Гамшгаас хамгаалах Улсын хяналтын ахлах байцаагч, хошууч Б.Батзаяа ярилаа.
Тус анги хуулиар хүлээсэн үүргийн дагуу гамшгаас урьдчилан сэргийлэх бүрэн хэмжээний тархалтын сургуулийг 47 удаа, тактикийн сургуулийг гурван удаа амжилттай зохион байгуулаад байна.
Нар минутад мандаж минутад жаргана.
Үс засуулвал: 
Суудал: 
