Удирдах ажилтны шуурхай зөвлөгөөний тойм

Эрдэнэт үйлдвэр” ТӨҮГ-ын удирдах ажилтны даваа гаргийн ээлжит шуурхай зөвлөгөөнийг Ерөнхий инженер Т.Батмөнх  удирдлаа. ХАБЭА-н хэлтэс өнгөрсөн долоо хоногт өндөр эрсдэлтэй 15 ажил гүйцэтгэж, ажлын байрны сөрөг хүчин зүйлсийн нийт 80 хэмжилт хийсэн байна. Мөн нийт ажилтны болон 19 ажлын байрны сургалтад 28 ажилтныг хамруулжээ. Байгаль орчин, ногоон хөгжлийн хэлтэс өнгөрсөн 7 хоногт үйлдвэрийн газрын 2025 оны Байгаль орчны менежментийн төлөвлөгөөний биелэлтийг дүгнэж, аймгийн Засаг даргын захирамжаар байгуулагдсан ажлын хэсэгт тайлангаа хамгаалах бэлтгэл ажлыг ханган ажиллажээ. Мөн аюултай хог хаягдлыг устгах тусгай зөвшөөрөлтэй аж ахуйн нэгжид 45 тонн хаягдал тос шилжүүлэн ажилласан талаар дурдлаа. 
Үйлдвэрлэл, техникийн хэлтсээс 10-р сарын эхний 25 хоногийн үйлдвэрлэлийн үндсэн үзүүлэлтүүдийн талаар мэдээллээ. Тодруулбал, уулын цул гаргалт 99,7 хувь, хөрс хуулалт 99,2 хувь, хүдэр дамжуулалт 101,8 хувь, хүдэр боловсруулалт 102,1 хувийн гүйцэтгэлтэй байна. Энэ хугацаанд 52 вагон баяжмал илүү ачжээ. Улсын хэмжээнд шатахууны хомсдол үүсэж болзошгүй байгаа энэ үед үйлдвэрийн газрын хэмжээнд АИ-92 бензин 59 хоногийн, АИ-95 бензин 53 хоногийн нөөцтэй байгаа талаар мэдээлэв. Баяжуулах үйлдвэр мэдээлэлдээ, эрүүл мэндийн урьдчилан сэргийлэх үзлэгт 1135 хүн хамрагдсан. Намар, өвлийн бэлтгэл ажил 89 хувийн гүйцэтгэлтэй явааг онцлов. 
Спорт цогцолбор мэдээлэлдээ, Эрдэнэт үйлдвэрийн уламжлалт 45 дугаар спартакиад спортын 14 төрлөөр явагдаж байна. Нээлтийн ажиллагааг Спорт цогцолборын шинэ хичээлийн жилийн нээлттэй хамтатган зохион байгууллаа. Спортын тэмцээнүүд 10 хоногийн турш үргэлжилж, өндөрлөнө. 11-р сарын 01-нд хаалтын үйл ажиллагаанд шагнал гардуулах талаар тодотгоод баг тамирчдаа идэвхтэй оролцуулж байгаа бүтцийн нэгжийн удирдлагуудад талархал илэрхийлэв. 
Шуурхай зөвлөгөөний төгсгөлд, Ерөнхий инженер Т.Батмөнх үйлдвэрлэлийн тасралтгүй найдвартай үйл ажиллагаанд зайлшгүй шаардлагатай бараа материалын захиалга, ханган нийлүүлэлт, экспортын бүтээгдэхүүний баяжмал ачилтад анхаарал хандуулж, шатахуун түгээх станц болон нөөцийн савны асуудлыг шийдэж ажиллах шаардлагатай байгаа талаар холбогдох бүтцийн нэгжийн удирдлагуудад үүрэг болголоо.