“Эрдэнэт үйлдвэр” ТӨҮГ-ын Улаанбаатар дахь төлөөлөгчийн газрын 47 жилийн ой ирэх 11 дүгээр сард тохионо. Тус ойг тохиолдуулан Монгол Улсын Ерөнхийлөгчийн зарлигаар Улаанбаатар дахь төлөөлөгчийн газрын зургаан ахмад ажилтныг төрийн дээд “Алтангадас” одонгоор шагнасныг Аж үйлдвэр, эрдэс баялгийн сайд Г.Дамдинням өнгөрсөн долоо хоногт гардууллаа.
“Эрдэнэт үйлдвэр” ТӨҮГ-ын Улаанбаатар дахь төлөөлөгчийн газарт олон жил үр бүтээлтэй ажиллаж, эдүгээ гавьяаны амралтаа эдэлж буй тус газрын Ахмад ажилтан Ч.Дэлгэрсайхан, Ц.Батбаяр, Ш.Энхжаргал, О.Ганбат, Х.Эрдэнэчимэг, Г.Хүрэлсүх нарт хөдөлмөр зүтгэлийг нь үнэлэн ийнхүү “Алтангадас” одонгоор шагнасан нь нэг хамт олноос зэрэг зургаан алтан гадас ихэрлүүлсэн ховор үйл явдал болжээ.
Тус газрын ахмад ажилтан Чимэддоржийн Дэлгэрсайхан нь Эрдэнэт үйлдвэрт 32 жил ажиллахдаа Ил уурхайд цахилгаанчин, Сургалтын төвд багш, Спорт ордонд дасгалжуулагч, Орон сууцны удирдах газарт хөдөлмөр хамгааллын инженер, Улаанбаатар дахь төлөөлөгчийн газарт I зэрэглэлийн мэргэжилтнээр ажиллаж байсан бол ахмад ажилтан Цэгмидийн Батбаяр нь Улаанбаатар дахь төлөөлөгчийн газарт үйлчлэгчээр тасралтгүй 32 жил ажиллаж байгаад өндөр насны тэтгэвэртээ гарчээ. Ахмад ажилтан Шагдарын Энхжаргал Унгар Улсын Будапешт хотын Эдийн засгийн дээд сургуулийг гадаад худалдааны эдийн засагч мэргэжлээр дүүргэн, Төлөөлөгчийн газарт менежерээр 23 жил, ахмад ажилтан Оргодолын Ганбат нь жолоочоор 22 жил, Хүүхэндээгийн Эрдэнэчимэг нарийн бичиг, аж ахуйн эрхлэгчээр 15 жил, Гэндэнжамцын Хүрэлсүх үйлчлэгч, албан тасалгааны цэвэрлэгчээр 15 жил тус тус тасралтгүй ажилласан байна.
Зууны манлай Эрдэнэт үйлдвэрийн уурхайчин хамт олны эд эс болж, улмаар Улаанбаатар дахь төлөөлөгчийн газрын үйл ажиллагаа өргөжин хөгжихөд өөр өөрсдийн хувь нэмрээ оруулсан ихэр одонт ахмадуудаа хамт олон нь чин сэтгэлийн баяр талархалтайгаар хүлээн авч, баяр хүргэв.
1978 оны 11 дүгээр сарын 01-нд Монгол-Зөвлөлтийн хамтарсан Уул уурхайн баяжуулах “Эрдэнэт” үйлдвэрийн Ерөнхий захирал тушаал гаргаж, Ерөнхий захирлын туслах Семенов Николай Матвеевичийг Улаанбаатар хот дахь төлөөлөгчийн газрын даргын албан тушаалд томилсноор өнөөгийн “Эрдэнэт үйлдвэр” ТӨҮГ-ын Улаанбаатар дахь төлөөлөгчийн газар үүсэн байгуулагдах эхлэл болсон юм. Өөрөөр хэлбэл, Эрдэнэт үйлдвэрийн гадаад үйл ажиллагаатай холбоотой олон талын харилцаа холбоог төлөөлөн ажиллах чиг үүрэг бүхий тус газрыг энэ цаг үеэс байгуулжээ. Улаанбаатар дахь төлөөлөгчийн газар нь Эрдэнэт үйлдвэрийг гадаад талд төлөөлөн ажиллахаас гадна Эрдэнэт үйлдвэрт ажиллаж байгаа гадаад ажилтныг Монгол Улсад хөдөлмөр эрхлэх болон үйлдвэрийн бүхий л гадаад томилолт, албан айлчлал, сургалтын виз, бичиг баримтыг бүрдүүлэх, үйлдвэрлэлийн чанарын дээж шинжлүүлэх зэрэг олон талын үүрэг чиглэлийг эрхлэн хариуцдаг юм.
Нар минутад мандаж минутад жаргана.
Үс засуулвал: 
Суудал: 
