Одоогоос дөрвөн жилийн өмнө “Эрдэнэт үйлдвэр” ТӨҮГ хүний нөөцийн менежментийн тогтолцооны ISO 30400 олон улсын багц стандарт хэрэгжүүлэх ажлыг эхлүүлсэн. Монгол Улсын хөгжлийн хөтөлбөр, түүнд тавигдсан хүний нөөцийн хөгжлийн зорилго, зорилт, Эрдэнэт үйлдвэрийн хэтийн төлөв, хөгжлийн зорилгыг хангасан, олон улсын стандартад нийцсэн хүний нөөцийн үйл ажиллагаа зохион байгуулах зорилгоор энэхүү стандартыг Хүний нөөц, захиргааны хэлтсийн мэргэжилтнүүд хэрэгжүүлж, өнөөдрийг хүртэл тасралтгүй сайжруулалт хийсээр ирсэн. Энэ хугацаанд анхдагч баталгаажуулалт, магадлан 1, 2 баталгаажуулалтын аудитыг амжилттай давж, Эрдэнэт үйлдвэр хүний нөөцийн менежментийн тогтолцооны ISO 30400 олон улсын багц стандартын ахисан түвшний “одтой” гэрчилгээг өнгөрсөн жил Францын “Афнор” группээс гардсан нь амжилтын том баталгаа болсон юм. Анхны баталгаажуулалтын гэрчилгээний хугацаа энэ онд дуусгавар болж байгаатай холбогдуулан хүний нөөцийн мэргэжилтнүүд давтан баталгаажуулалтын аудитад орох бэлтгэлээ хангаж, өнөөдөр нээлтийн хурлаа хийлээ.
Нээлтийн үйл ажиллагаанд Францын “Афнор” группын олон улсын Тэргүүлэх аудитор А.Оленков оролцож, давтан баталгаажуулалтын аудитын зорилгыг танилцуулсан бол “Эрдэнэт үйлдвэр” ТӨҮГ-ын Хүний нөөц, захиргааны хэлтсийн дарга О.Отгонбаяр хүний нөөцийн менежментийн тогтолцооны ISO 30400 багц стандартын хэрэгжилтийн талаар дэлгэрэнгүй мэдээлэл хийсэн юм. Тэрээр, стандарт хэрэгжүүлнэ гэдэг тасралтгүй сайжруулалт байдаг. Бид стандарт хэрэгжүүлсэн энэ дөрвөн жилийн хугацаанд нийт 37 бүтцийн нэгж дээрх 169 үл тохирлыг арилгаж, 381 анхааруулах асуудлыг залрууллаа. Ингэснээр баталгаажуулалтын болон магадлан аудитын хүрээнд анхааруулах асуудал долоон хувиар буурч, давуу талаа 1,5 хувиар, үнэлгээгээ 15 хувиар ахиулж чадлаа. Эрдэнэт үйлдвэрт хүний нөөцийн ISO 30400 багц стандарт хэрэгжсэнээр чанарын менежментийн болон бүтээгдэхүүн үйлчилгээний бусад стандартуудын хэрэгжилтэд томоохон үр нөлөө үзүүлж, соёл болж тогтох суурь болж байгааг онцлов.
Энэ удаагийн давтан баталгаажуулалтын аудит нь хүний нөөцийн менежментийн тогтолцоо нь байгууллагын одоогийн хамрах хүрээ, үйл ажиллагаа, стратеги зорилтод тохирч байгаа эсэхийг шалгах, тасралтгүй сайжруулалтыг дэмжих, сайжруулах боломжийг олж тогтоох, тогтолцооны үр дүнтэй байдлыг үнэлэх, гүйцэтгэлд дүн шинжилгээ хийх зорилготой аж. Хүний нөөцийн менежментийн тогтолцооны ISO 30400 олон улсын багц стандартын давтан баталгаажуулалтын аудит өнөөдрөөс гурав хоног үргэлжилж, дүгнэлтээ танилцуулах юм.
Нар минутад мандаж минутад жаргана.
Үс засуулвал: 
Суудал: 
