Удирдах ажилтны шуурхай зөвлөгөөний тойм

“Эрдэнэт үйлдвэр” ТӨҮГ-ын удирдах ажилтны даваа гаргийн ээлжит шуурхай зөвлөгөөнийг өнөөдөр боллоо. ХАБЭА-н хэлтэс өнгөрсөн долоо хоногт өндөр эрсдэлтэй 15 ажил гүйцэтгэж, Барилга засварын цех, Спорт цогцолбор, Соёл, урлагийн цогцолборт 4-р шатны хяналт шалгалтыг зохион байгуулжээ. Бүтцийн нэгжүүд тус шалгалтаар хангалттай үнэлгээ авсан. Цас орж, цаг агаар хүйтэрч байгаатай холбогдуулан, үйлдвэрийн бүсэд нэвтэрч байгаа автомашинуудын дугуйг өвлийн дугуйгаар солих аян зохиосон байна. Мөн нийт ажилтны болон ажлын байрны сургалтад 238 ажилтныг хамруулжээ. 

Байгаль орчин, ногоон хөгжлийн хэлтэс овоолгуудаас гарч байгаа хүчиллэг усанд тогтмол хяналт тавин ажилласан. Өнгөрсөн долоо хоногт Эрдэнэт үйлдвэрийн ажилтнууд Баян-Өндөр ууланд 1500 мод, Мэргэшсэн нягтлан бодогчдын Спортын их наадамд оролцогчид 300 ширхэг мод тарьсан байна. 

Үйлдвэрлэл, техникийн хэлтсээс 10-р сарын эхний 19 хоногийн байдлаар үйлдвэрлэлийн үндсэн үзүүлэлтүүдийн талаар мэдээллээ. Тодруулбал, уулын цул гаргалт 98,6%, хөрс хуулалт 98,7%, хүдэр дамжуулалт 102,1%, хүдэр боловсруулалт 100,5%-ийн гүйцэтгэлтэй байна. Энэ хугацаанд баяжмал 57 вагоноор илүү ачилт хийжээ. Үйлдвэрийн хэмжээнд намар, өвлийн бэлтгэл ажил 93 хувийн биелэлттэй байна.
 
Баяжуулах үйлдвэрийн дарга М.Отгон өнгөрсөн долоо хоногт бүтээн байгуулалт өргөтгөл шинэчлэлийн ажлууд төлөвлөгөөний дагуу хийгдэж байгаа тухай мэдээллээ. 
Хүний нөөц, захиргааны хэлтсийн дарга О.Отгонбаяр улсын хэмжээнд зохион байгуулагдаж буй “Архив, албан хэрэг хөтлөлт, ажлын зохион байгуулалтын улсын үзлэг” энэ сарын 13-наас 21-ний өдрүүдэд Булган, Орхон аймагт явагдаж байгаа бөгөөд өнөөдрөөс манай үйлдвэрт улсын үзлэг эхэлж байгааг мэдээллээ. 
Шуурхай зөвлөгөөний төгсгөлд Үйлдвэрийн газрын Ерөнхий захирал Г.Ёндон үйлдвэрлэлийн тасралтгүй найдвартай үйл ажиллагаанд зайлшгүй шаардлагатай бараа бүтээгдэхүүний захиалга, нийлүүлэлтийн доголдлыг арилгах, нийлүүлэлтийг тогтмолжуулж, нөөц бүрдүүлэхэд холбогдох бүтцийн нэгжийн удирдлагуудыг анхаарч ажиллахыг үүрэг болголоо.