Удирдах ажилтнуудын шуурхай зөвлөгөөний тойм

“Эрдэнэт үйлдвэр” ТӨҮГ-ын удирдах ажилтны даваа гаргийн ээлжит шуурхай зөвлөгөөнийг өнөөдөр Ерөнхий инженер Т.Батмөнх удирдлаа.
Байгаль орчин, ногоон хөгжлийн хэлтсээс, Орхон аймгийн Баян-Өндөр сумын Засаг даргын ой, хээрийн түймрээс урьдчилан сэргийлэх, хамгаалах арга хэмжээг эрчимжүүлэх захирамжийн дагуу Гамшгаас хамгаалах штаб, Гэрээт Гал унтраах 58 дугаар ангитай хамтран Сархиа уул, Бүрэнбүстийн овоо, Хар модотын даваа, Цагаанчулуут, Ар булаг зэрэг газруудад эргүүл шалгалт хийсэн талаар мэдээллээ. Мөн цагаан тоосны нөлөөллийн бүсэд амьдарч буй 500 иргэнийг эрүүл мэндийн нарийвчилсан үзлэг шинжилгээнд хамруулсан. Үзлэгийн тайлан эцэслэн гарсан бөгөөд иргэдийн эрүүл мэндэд цагаан тоосны нөлөөлөл байхгүй гэсэн хөндлөнгийн дүгнэлт гарсан тухай мэдээллээ.
Үйлдвэрлэл, техникийн хэлтсээс 10 дугаар сар гарсаар үйлдвэрлэлийн үндсэн үзүүлэлтүүд 100 давсан хувиар биелж явааг онцоллоо. Тухайлбал, уулын цул гаргалт +14200 м3, хөрс хуулалт +8800 м3, хүдэр олборлолт +40500 тонн, хүдэр боловсруулалт +11000 байв. Энэ хугацаанд 22,51 хувийн агуулгатай, 4503 тонн цэвэр зэс агуулсан 2000 тонн зэсийн баяжмал үйлдвэрлэсэн байна. Харин молибденын баяжмалын хувьд сарын эхнээс 49 контейнерыг гаргажээ. 
Үйлдвэрлэл, техникийн бодлогын газар шинэ ТЭЗҮ-ээр илэрсэн Ил уурхайн нөөц ашиглалттай холбоотой нэмэлт хөрс хуулалтын ажлын талаар зөвлөлдөх уулзалт зохион байгуулахаар төлөвлөж байна. Үүний үр дүнд 12000 тонн зэсийн баяжмал нэмж үйлдвэрлэвэл жилийн эцэст үйлдвэрлэл, эдийн засгийн үзүүлэлт илүү сайн гарах төлөвтэйг Ерөнхий инженер энэ үеэр онцолсон. 
Баяжуулах үйлдвэрийн дарга М.Отгон, Нунтаглан баяжуулах хэсгийн 5-р тээрэм шинэчлэх ажлыг 456 цагт гүйцэтгэн, 72 цагийн туршилт, зүгшрүүлэлт амжилттай дуусаж, байнгын ашиглалтад өнгөрөгч амралтын өдөр хүлээн авсныг мэдээлээд, хамтарч ажилласан бүтцийн нэгжүүдэд талархал илэрхийлэв.
Санхүү, нягтлан бодох бүртгэлийн хэлтсээс Үндэсний аудитын газрын 14 аудитор Эрдэнэт үйлдвэрт 28 хоног ажиллах учраас бүтцийн нэгжүүд шаардлагатай мэдээллийг тухай бүр өгч, хамтран ажиллахыг хүслээ. Улсын хэмжээнд зохион байгуулагдаж буй “Архив, албан хэрэг хөтлөлтийн улсын үзлэг” энэ сарын 13-наас 21-ний өдрүүдэд Булган, Орхон аймагт явагдана гэдгийг Хүний нөөц, захиргааны хэлтсээс дуулгасан. Тус хэлтэс 23 чиглэлийн 81000 орчим тайлан мэдээлэл бэлтгэж, Улсын үзлэгт хамрагдах бэлэн байдлыг ханган ажиллаж байгааг мэдээллээ. 
Хамтын ажиллагаа, нийгмийн харилцааны бодлогын газраас Нийгмийн тусламж, дэмжлэгийн ажлын хэсгийн шийдвэрээр энэ жил 318 ажилтны хүүхдэд нийт 276,2 сая төгрөгийн сургалтын төлбөрийн дэмжлэг үзүүлсэн бол III улиралд 44 ажилтанд орон сууцны хөнгөлөлт болох 572 сая төгрөг олгоно гэж мэдээллээ. Мөн гэр хороололд амьдардаг ажилтан, өндөр настан, мэргэжлээс шалтгаалах өвчний улмаас хөдөлмөрийн чадвар алдалтын хувь тогтоолгосон иргэдэд түлшний үнийн хөнгөлөлт олгох ажил эхэлж байна.
Шуурхай зөвлөгөөний төгсгөлд, Ерөнхий инженер Т.Батмөнх цахим шилжилттэй холбоотой гарч буй аливаа хүндрэлийг хамтдаа даван туулах, нэн шаардлагатай худалдан авалтыг эрэмбэлж, царцаалтаас гаргах, хөрөнгө оруулалт, бүтээн байгуулалтын ажилд онцгой анхаарал хандуулж ажиллахыг бүтцийн нэгжийн удирдлагуудад үүрэг болгов.