Ачаа тээврийн хэсгийнхэн ахмад ажилтнаасаа туршлага судаллаа

Ахмадын баярыг угтан Тээвэр, ложистикийн төвийн Ачаа тээврийн хэсгийн хамт олон ахмад ажилтан Ж.Цэцэгмаагийнд зочилж, төмс, ногоо хураах, зөгийн аж ахуйн ажилд нь тусалж, сүү цагаан идээ боловсруулах арга туршлагаас нь суралцжээ. 
Өнгөрсөн онд Эрдэнэт үйлдвэрийн “Ахмаддаа ээлтэй цех”-ээр шалгарсан тус төв энэ жил ахмадын баярыг тохиолдуулан алба, товчоо, хэсгүүдийнхээ дунд нэг ахмадыг сонгон, амьдрал, хоббигоос нь суралцан сурталчлах, туслан дэмжих аян өрнүүлжээ. Үүний зэрэгцээ ахмад – дунд - залуу гурван үеийн уулзалт зохион байгуулж, ахмадуудаа хүндэтгэх олон талын үйл ажиллагааг төлөвлөн хэрэгжүүлж байна.
Энэ хүрээнд Ачаа тээврийн хэсгийнхэн ахмад ажилтан Ж.Цэцэгмаагийнд зочилж, ажилч хичээнгүй зан, амьдралын баялаг туршлагаас нь суралцаж, нэгэн өдрийг дурсамж дүүрэн өнгөрүүлжээ.
Ж.Цэцэгмаа нь Эрдэнэт үйлдвэрийн Төмөр замын цехэд замчин, ачаа вагон хүлээлцэгч-пүүлэгчээр тасралтгүй 30 жил ажиллаад гавьяаныхаа амралтад гарсан. Харин түүний нөхөр Н.Баасанжав нь Авто тээврийн цехэд ажиллаж, Монгол Улсын баатар үйлдвэрийн Хүндэт дэвтэрт нэрээ мөнхөлсөн бахархалт ахмад ажилтан юм.