Баянцагаан, Говил багийн иргэд “Цагаан тоос"-ны дэгдэлт бууруулах дэд хөтөлбөрийн ажилтай танилцлаа

Эрдэнэт үйлдвэрийн Байгаль орчин, ногоон хөгжлийн хэлтсээс "Цагаан тоос" дэд хөтөлбөрийн хүрээнд хийж буй ажлаа өнөөдөр нөлөөллийн бүс болох говил, вокзал орчмын оршин суугч, иргэдэд танилцуулав. Нөлөөллийн бүсэд амьдарч байгаа 500 гаруй иргэнийг энэ онд эрүүл мэндийн үзлэгт хамруулсан. Тус ажлыг Эрдэнэт үйлдвэр санхүүжүүлж, аймгийн Эрүүл мэндийн газартай хамтран зохион байгуулжээ. Мөн энэ жил иргэдийн оролцоотой, соён гэгээрүүлэх сургалт, үйл ажиллагааг зохион байгуулах аж. 
“Цагаан тоосны дэгдэлтийг дарах зорилгоор намираа шланг хоолой ашиглан усаар норгох, хуурайшилттай талбайд хаялтаа өгөх, полимер төрлийн бодис найруулан тусгай зориулалтын техникээр цацалт хийж, цагаан тоосны дэгдэлтийг бууруулан ажиллаж байна. “Орхон аймгийн Иргэдийн Төлөөлөгчдийн хурлаар цагаан тоосны дэгдэлт, сөрөг нөлөөллийг бууруулах дэд хөтөлбөрийг баталсан. Энэ хөтөлбөрт тусгасан ажлын хэрэгжилтийг иргэдэд өнөөдөр танилцуулж байгаа юм. Ирэх 7 хоногт Жаргалант сумын иргэдэд цагаан тоос бууруулах ажил болон Эрдэнэт үйлдвэрийн үйл ажиллагааны талаар танилцуулна. Одоогоор цагаан тоосны дэгдэлтийг бууруулах усалгааны систем болон шүрших техникүүдээ ажилд бэлтгэж байна” гэж Байгаль орчин, ногоон хөгжлийн хэлтсийн инженер Н.Наранчимэг ярилаа. 

Баянцагаан багийн иргэн Б.Даваасүрэн: 
Манай багийн иргэдийн төлөөлөл Эрдэнэт үйлдвэрээс зохион байгуулж байгаа цагаан тоосны дэгдэлтийг бууруулах үйл ажиллагаатай газар дээр нь танилцлаа. Сэтгэгдэл өндөр байна. Үнэхээр их ажил хийдэг юм байна. Цаашид ийм арга хэмжээ авч ажиллаж байгаагаа иргэдэд сонирхуулж, үзүүлж байх хэрэгтэй. Би хоёр жил эрүүл мэндийн үзлэгт хамрагдсан. Нэг их ноцтой юм илрээгүй.

Говил багийн иргэн Ж.Бадамсүрэн: 
Ах нь вокзалд ажилладаг. Энэ онд гавьяаныхаа амралтад гарсан. Цагаан тоосны дэгдэлтийг буурах чиглэлээр нэлээн ажил хийсэн байна. Яваандаа Хаягдлын аж ахуйг нүүлгэн шилжүүлэх талаар мэдээллээ. Энэ нь зөв байх. Би эрүүл мэндийн үзлэгт хамрагдсан хүмүүсийн нэг. Хүмүүсийн шинжилгээ янз бүр гарсан байна. Цагаан тоосыг дарах шинэ технологи нэвтрүүлж ажилласан нь таалагдлаа. Харин техник хүрэхгүй газар нь норголт хийхгүй хаягддаг юм байна. Энэ асуудалд анхаарал хандуулж ажиллах шаардлагатай байна.