“Залгамж” хөтөлбөрийнхөн аз жаргалтай амьдрал бүтээх сургалтад хамрагдлаа

Эрдэнэт үйлдвэрийн Хүний нөөцийн хөгжлийн цогц хөтөлбөрийн нэг болох “Залгамж” хөтөлбөрийнхөн “Аз жаргалтай амьдралыг бүтээх нь” сургалт-идэвхжүүлэлтийн үйл ажиллагаанд оролцлоо. Туршлагатай ажилтнуудад амьдралын дараагийн үед буюу ажил эрхлэлтийн дараах сэтгэл зүйн өөрчлөлтийг даван туулахад бэлтгэх, нийгмийн харилцааг идэвхтэй хадгалах, шинэ хобби, сонирхол олоход туслах, эерэг өөрчлөлт авчрах арга барил сургах зорилгоор “Coach Lab” сургалтын төвийн зөвлөх Б.Бат-Отгон багшийг хөтөлбөр хэрэгжүүлэх багийнхан урьж, “Ирээдүйгээ хэрхэн бүтээх вэ?”, “Шинэ эриний нүүдэлчид” сэдэвт сургалт зохион байгуулав. 
Сургалт, идэвхжүүлэлтийн үйл ажиллагааны эхэнд Хүний нөөц, захиргааны хэлтсийн Хүний нөөцийн албаны дарга Б.Одгарьд, “Залгамж” хөтөлбөрийн зорилгыг “Мэдлэг туршлагатай, мэргэжлийн өндөр ур чадвартай ажилтнуудыг амьдралын дараагийн үе шатанд бэлтгэх, шинэ үеийн залуусыг зохион байгуулалттайгаар сургаж, хөгжүүлэх, байгууллагын онцлог технологи, үйлдвэрлэлийн ноу-хауг хадгалан үлдээж, хүний нөөцийн тогтвортой байдлыг хангах, урт хугацааны хөгжлийн баталгааг бий болгох” хэмээн тодотгосон юм. 
Энэ үеэр, гавьяаны амралтад гарахдаа хэсгийн залуустаа олон жил хэрэглэсэн гарын багаж хэрэгслээ, мөн чөлөөт цагаа идэвхтэй өнгөрөөж байгаарай, гээд сагсан бөмбөг, гар бөмбөг, хөл бөмбөг бэлэглэж, үлгэрлэл манлайлал үзүүлсэн Баяжуулах үйлдвэрийн Засварын хэсгийн цахилгаан ба хийн гагнуурчин Н.Батзул, Ус хангамжийн цехийн Цэвэр ус хангамжийн тоног төхөөрөмжийн засварчин Н.Занданшатар нарт Эрдэнэт үйлдвэрийн “Талархлын багц” гардуулав. 
Мөн Баяжуулах үйлдвэрийн хөвүүлэн баяжуулагч П.Нямсүрэн - О.Отгонбаяр, М.Жаргалан - С.Энхсаруул, конвейерийн машинч Б.Мөнхзул - О.Мөнхсолонго, Ус хангамжийн цехийн цахилгаанчин Б.Сүхчулуун - Б.Тамир, шугам хоолойн засварчин Б.Баярсайхан - П.Болд-Эрдэнэ, Дулааны цахилгаан станцын хөдөлмөрийн эдийн засагч С.Лхагвасүрэн - Г.Чанцалмаа, Авто тээврийн цехийн хүнд даацын машины жолооч С.Сүрэнрагчаа - Ц.Баянбат нарын 20 ажилтан багш шавийн гэрээ байгуулж, өнөөгийн туршлагыг маргаашийн залгамжид шилжүүлэхээр хамтран ажиллах эхлэлийг тавилаа.