Уул уурхайн 7 хоногийн хүрээнд “Нэн түрүүнд ХАБ-2025” бага хурал боллоо

“Уул уурхайн 7 хоног” арга хэмжээний хүрээнд 4 дэх жилдээ зохион байгуулж буй “Нэн түрүүнд-ХАБ” бага хурал Уул уурхайн салбарын хөдөлмөрийн аюулгүй байдал, эрүүл ахуйн сайн туршлагаа харилцан түгээж дэлгэрүүлэх уриан дор боллоо. Бага хурлын үйл ажиллагааг “МОШПА” ТББ-ын Удирдах зөвлөлийн дарга, доктор, профессор С.Давааням нээж, 2012 оноос эхлэн, тасралтгүй 14 дэх жилдээ, “Mining Week &MinePro 2025” үзэсгэлэн, чуулга уулзалтын хүрээнд 4 дэх удаагаа зохион байгуулагдаж байгаа тус хурлын онцлог, ач холбогдлыг энэ үеэр хэлсэн үгэндээ онцоллоо.
Уул уурхайн салбарын хамгийн чухал, цаг үргэлж онцгой анхаарал хандуулж байх асуудал бол хөдөлмөрийн эрүүл ахуй, аюулгүй ажиллагаа. Энэ бол уул уурхайг сайн харагдуулах, амжилттай ажиллах гол үндэс. Салбарынхан та бүхэн аюулгүй ажиллагааны сайн туршлагаа хуваалцаж, ХЭМАБ-ын олон улсын ISO 45001 стандарт хэрэгжилт, үйл явцаас мэдээлэл солилцохыг мөн уриаллаа. “Нэн түрүүнд-ХАБ” бага хурлын үйл ажиллагааг дэмжин, ивээн тэтгэж ирсэн “Эрдэнэт үйлдвэр” ТӨҮГ, Оюутолгой ХХК-ийн хамт олонд зохион байгуулагчдын зүгээс талархал илэрхийлэв. “Нэн түрүүнд ХАБ-2025” хурлын эхэнд “ХЭМАБ-ын манлайлал, удирдлагын чадамж, үнэлгээ”сэдэвт илтгэлийг “Оюу толгой” ХХК-ийн Эрүүл мэнд, аюулгүй ажиллагаа, байгаль орчин, аюулгүй байдал хариуцсан Ерөнхий менежер Кайл Бакол тавьж, “Эрсдэлийн менежментийн чадамж: Байгууллага ба хувь хүн” илтгэлийг “Эрдэнэт үйлдвэр” ТӨҮГ-ын ХАБЭА-н хэлтсийн дарга Д.Мөнхболд танилцууллаа.
Мөн Эрсдэлийн менежментийн засаглал, ХЭМАБ-ын чадамж зэрэг сэдэвт илтгэл тавьж, бага хуралд оролцогчдын дунд нээлттэй хэлэлцүүлэг өрнүүллээ.