Эрдэнэт үйлдвэрийн Хэвлэл мэдээлэл, олон нийттэй харилцах албаны сэтгүүлч, яруу найрагч Түмэндэмбэрэлийн Батчулууны сэтгүүл зүйн “Эрдэнэтийн бичвэрүүд”, яруу найргийн “Сэтгэлийн гэрэл” хос номын нээлт Соёл, урлагийн цогцолборт өнөөдөр боллоо.
МЗЭ-ийн болон МСНЭ-ийн гишүүн, Орхон аймаг дахь салбарын Удирдах зөвлөлийн Тэргүүлэгч Т.Батчулуун хос номын баяраа өнгөрсөн сард Улаанбаатар хотын Төв номын санд, Монгол Улсын Ерөнхийлөгчийн нэрэмжит танхимд хийсэн бол энэ удаа Орхон аймгийн утга зохиол, сэтгүүл зүйн хүрээний журмын нөхөд, номын садан, Эрдэнэт үйлдвэрийн уурхайчин хамт олондоо хос номын дээжээ хүртээж, уран бүтээлийн баяраа хамт тэмдэглэлээ.
Монгол Улсын Утга зохиолын дээд сургуулийг Утга зохиолын ажилтан, сэтгүүлч мэргэжлээр төгссөн тэрээр хэвлэл мэдээллийн салбарт тасралтгүй 26 жил ажиллахдаа, “Амь сэтгэл”, “Тод анир”, “Эрдэнэт хүмүүн толь”, “14 дүгээр Далай ламын намтар цадиг болоод мэргэдийн цомог оршивой” зэрэг яруу найраг, сэтгүүл зүйн ном туурвисан юм. Эрдэнэт үйлдвэрийн Хэвлэл мэдээлэл, олон нийттэй харилцах албанаас эрхлэн гаргадаг “Өнөөгийн Эрдэнэт” сонины анхны сэтгүүлчдийн нэг Т.Батчулуун олон арван хөрөг нийтлэл, ярилцлага, сурвалжилга, тэмдэглэл бичиж, Монгол Улсын Баатар үйлдвэрийнхээ түүхийг бичиглэн үлдээсэн гавьяатай. Үүний зэрэгцээ “Баян-Өндөр хайрхан”, “Эхийн сэтгэл”, “Далд анир”, “Чамайг бодох сайхан” зэрэг 50 гаруй дуу, нийтийн дуу, “Онон Балж домог түүхийн өлгий” баримтат кино, "Уран бүтээлчийн цаг" телевизийн цуврал нэвтрүүлгийг үзэгчдийн хүртээл болгосон. “Эрдэнэтийн бичвэрүүд”, “Сэтгэлийн гэрэл” бүтээл нь түүний оюуны өвийн тав, зургаа дахь ном болон мэндэлж, уншигчдын сэтгэлд гэрэл асаав.
Сэтгүүл зүй, яруу найраг гэх “хос морьтой” уран бүтээлч, сэтгүүлч Т.Батчулуундаа шинэ номоороо уншигчдынхаа мэлмийг мялааж байгаад уурхайчдынхаа нэрийн өмнөөс баяр хүргэе.
Нар минутад мандаж минутад жаргана.
Үс засуулвал: 
Суудал: 
