Монгол Улсын Ерөнхийлөгчийн санаачлагаар улс орон даяар өрнөж буй “Тэрбум мод” үндэсний хөдөлгөөнд “Эрдэнэт үйлдвэр” нэгдэж, 100 сая мод тарьж ургуулахаар үүрэг, амлалт хүлээн авснаас хойш гурав дахь жилдээ ажиллаж байна. Энэ хугацаанд тус үйлдвэр дэргэдээ Ойн генетикийн мэргэжлийн төв байгуулан, Орхон аймгийн газар нутаг, Хангал голын дагуу болон Хаягдлын аж ахуйн ойр орчимд нийт 3.6 сая мод тарьж, арчлан ургуулж байна. Түүнчлэн “Тэрбум мод” хөдөлгөөний хүрээнд Мод үржүүлгийн хоёр газрыг говийн болон хангайн хуурай бүсэд байгуулахаар ажиллаж байгаа бөгөөд нэг нь Дундговь аймагт баригдах юм. Энд нийт 50 га газрыг хамран, жилд 5 сая мод үржүүлж, суулгац үр бэлдэнэ. Говийн ургамлын ургалт хурдан байдаг тул бүсчилсэн Мод үржүүлгийн газрыг түшиглэн 30 сая мод тарих зорилготой гэж “Эрдэнэт үйлдвэр” ТӨҮГ-ын дэргэдэх Ногоон хөгжлийн төслийн нэгжийн дарга Б.Сэр-Оддамба ярилаа. Мөн Ойн генетикийн төвийн дэргэд Мод үржүүлгийн бүрэн автомат “Эрдэнэт” цогцолборыг барьж байгуулахаар ажиллаж байна. Өнөөдрийн байдлаар, мод үржүүлгийн талбайн хашаа, усалгааны систем, цахилгаан хангамж зэрэг асуудлуудыг шийдвэрлэсэн бол ирэх онд цогцолборын барилга байгууламж бүрэн дуусаж, ашиглалт орох ажээ.
“Тэрбум мод” үндэсний хөдөлгөөн, хариуцлагатай уул уурхай бий болгох хүрээнд бүх нийтийн мот тарилт, байгалийн нөхөн сэргээлтийн ажлууд ч үе шаттай үргэлжилж байна. Энэ ажлыг үйлдвэрийн Байгаль орчин, ногоон хөгжлийн хэлтэс, Ногоон хөгжлийн төслийн нэгж хамтран, зохион байгуулдаг бөгөөд 2025 оны хаврын бүх нийтийн тарилтаар найман төрлийн 100584 ширхэг мод бут суулгаж, тарьжээ. Өөрөөр хэлбэл, Эрдэнэт үйлдвэрийн уурхайчид “100 сая мод тарих” хөтөлбөр, төлөвлөлтийн дагуу энэ хавар Булган аймгийн Сэлэнгэ сумын Шар талд 3000 улиас, “Уурхайчдын спортын их наадам-2025” тэмцээний оролцогч баг тамирчид “Ногоон-төгөл” талбайд 1500 гүйлс мод тарьсан байна.
Мөн орон нутгийн тусгай хамгаалалттай газар нутаг болох Баян-Өндөр уулын Хүрэнбулагийн аманд 556 ширхэг шинэс, улиас мод тарьж усалгаа, арчилгааг хийж байгаа бол дүйцүүлэн хамгаалах нөхөн сэргээхээр 3 га талбайг хашаажуулах, 1500 ширхэг шинэс мод тарих ажлыг “Алхими” ХХК-тай хамтран эхэлжээ. Харин энэ намар уурхайчид 1200 ширхэг гүйлс модны суулгацыг нэмж тарихаар төлөвлөн, бэлдэж байгаа аж.
Нар минутад мандаж минутад жаргана.
Үс засуулвал: 
Суудал: 
