Ерөнхий захирал Г.Ёндон, Азийн аварга шалгаруулах тэмцээнд оролцох “Хангарьд” клубын хөл бөмбөгийн багийн тамирчидтай уулзаж, амжилт хүслээ

Эрдэнэт үйлдвэрийн дэргэдэх “Хангарьд” спорт клубын П.Баярцэнгэл ахлагчтай хөл бөмбөгийн багийн тамирчид ирэх 8 дугаар сард Тайвань улсыг зорино. Тэд, Монголын Хөлбөмбөгийн 2024-2025 оны Дээд лигийн дэд аваргаар шалгарснаар Азийн Хөлбөмбөгийн холбооноос зохион байгуулдаг энэ удаагийн олон улсын AFC Challenge League тэмцээнд Монгол Улсаа төлөөлөн оролцох эрхтэй болсон юм. Үүнтэй холбогдуулан “Эрдэнэт үйлдвэр” ТӨҮГ-ын Ерөнхий захирал Г.Ёндон албаны бусад хүмүүсийн хамтаар “Хангарьд” клубын хөл бөмбөгийн багийн тамирчдыг хүлээн авч уулзан, амжилт хүслээ. 
Тэрээр уулзалтын үеэр багийн гишүүд бүртэй танилцан, санал солилцохын зэрэгцээ, “Багийн спортоор амжилт гаргах нь Монголчуудын хувьд хол санагддаг байсан үе саяхан. Харин энэ ойлголт өөрчлөгдөж, сүүлийн жилүүдэд манайхан багийн спортоор маш өндөр амжилт үзүүлэн, дэлхийд өрсөлддөг болсныг сагсан бөмбөгийн 3х3, 5х5 багийнхан тус тус тод харуулж байна. Тэгэхээр хөл бөмбөгийн багийнхан та нарт ч энэ амжилт ойрхон байгаа. Хамгийн гол нь багийн спортод тууштай, үр дүнтэй бэлтгэл сургуулилалтаас гадна эв нэгдэл, бие биеэ гэсэн хүндлэл нэн чухал. Энэ бүхнийг сайн санаж, багаараа амжилттай оролцоод ирээрэй” хэмээн хөл бөмбөгийн тамирчдадаа хандан хэлсэн. Түүнчлэн, тамирчдад бэлтгэлийн зарим өмсгөл хэрэглэгдэхүүн бэлэглэж, Азийн тавцанд өрсөлдөх тоглолтод нь амжилт хүслээ. 
Энэ үеэр Эрдэнэт үйлдвэрийн Спорт цогцолборын Хөл бөмбөгийн дасгалжуулагч А.Эрдэнэбаяр, “Манай “Хангарьд” клубын хөл бөмбөгчид энэ жилийн дээд лигт амжилттай тоглож, мөнгөн медаль хүртсэн. Ингэснээр Азийн өндөр зэрэглэлийн тэмцээнд оролцох эрхтэй болсон юм. Энэ тэмцээнд манай баг Тайвань улсын дээд лигийн аварга багтай 8 дугаар сарын 12-нд тоглохоор тов гарсан байгаа. Биднийг үргэлж дэмжин, ивээн тэтгэж буй Н.Төгөлдөр захиралтай “Apeiro” ХХК, улирлын болон улирал хоорондын бүхий л тоглолтуудын бэлтгэл сургуулилалт, арын албыг хариуцаж, туслалцаа үзүүлдэг Эрдэнэт үйлдвэрийн Спорт цогцолбор, “Хангарьд” клубтээ талархал илэрхийлье” гэсэн юм. 
“Хангарьд” клубын Хөл бөмбөгийн баг 1996 оноос эхлээд Монголын Хөл бөмбөгийн дээд лигт тасралтгүй оролцож ирсэн байна. Анх Эрдэнэт үйлдвэрийн уурхайчид голлон багийн бүрэлдэхүүнд байсан бол өнөө үед Эрдэнэтийн залуучууд тоглож, өндөр амжилт үзүүлэх болжээ. Тайвань улсад болох Азийн дээд лигийн тэмцээнд тус баг тамирчид 23-уулаа оролцоно. Багийн бүрэлдэхүүнд Эрдэнэт, Улаанбаатар хот болон гадаадын 5 тамирчин багтаж, бэлтгэл сургуулилтаа хийж байгаа аж.