Удирдах ажилтны шуурхай зөвлөгөөний тойм

Эрдэнэт үйлдвэрийн удирдах ажилтны даваа гаргийн ээлжит шуурхай зөвлөгөөнийг үйлдвэрлэл, техникийн бодлогын газрын дарга П.Батболор удирдан явууллаа. Шуурхайн эхэнд ХАБЭА-н хэлтсээс ойрын үед хийгдсэн ажлын талаар товч мэдээлэл өглөө. Улсын баяр наадмын хариуцлагатай жижүүр томилон ажиллуулсан. Бүтцийн нэгжүүдийн удирдлагуудад хөдөлмөрийн аюулгүй байдлыг сахин ажиллах, ажилтнуудад ажлын үүрэг даалгавар өгөхдөө учирч болзошгүй осол аюулын талаарх мэдээллийг тодорхой өгч байхад анхаарахыг онцоллоо. Байгаль орчин, ногоон хөгжлийн хэлтсээс өнгөрсөн долоо хоногт хүчиллэг ус хуримтлуулах бассейнуудад тогтмол хяналт тавин ажиллаж, дүүрсэн бассейныг суллаж, аюулгүй байдлыг ханган ажилласан байна. 
Үйлдвэрлэл, техникийн хэлтсээс үйлдвэрлэлийн төлөвлөгөөний энэ сарын эхний 20 хоногийн байдлаарх гүйцэтгэл танилцууллаа. Энэ сарын эхний 20 хоногийн байдлаар уулын цул гаргалт 99,2%, хөрс хуулалт 99,9%, хүдэр олборлолт 101,6%, хүдэр боловсруулалт 101,7 %, зэсийн металл авалт 100%, молибденын металл авалт 83,7%-тай, зэсийн баяжмал гаргалт, ачилт төлөвлөгөөний дагуу ачигдсан байна. Техникийн болон технологийн хэвийн горимыг ханган ажилласан байна.
Баяжуулах үйлдвэрийн хүдэр бэлтгэлийн I шугамын шинэчлэлийн ажил үргэлжилж, өнөөдрийн байдлаар газар шорооны ажил 70 хувийн гүйцэтгэлтэй байна. Хам баяжуулалтын II секцийн шинэчлэлийн ажил дуусаж, ашиглалтад оруулсан. Үйлдвэрлэлийн үйл ажиллагаа хэвийн үргэлжилж байна. 
Шуурхай зөвлөгөөний төгсгөлд Үйлдвэрийн газрын Ерөнхий захирал Г.Ёндон бүтцийн нэгжийн удирдлагуудад хагас жилийн 2025 оны төсвийн тодотгол болон 2026 оны хөрөнгө оруулалтын захиалгад оруулах саналаа боловсруулж өгөхийг үүрэг болголоо.