Эрдэнэт үйлдвэр “их зогсолт”-оор 490 багц ажлыг чанартай гүйцэтгэж, үйлдвэрлэлээ амжилттай залгалаа

Тасралтгүй үйл ажиллагаатай Эрдэнэт үйлдвэр жилд нэг удаа үйлдвэрлэлээ зогсоон, нөөцгүй тоног төхөөрөмжүүддээ иж бүрэн засвар үйлчилгээ хийж, найдвартай байдлыг хангадаг уламжлалтай. Энэ жилийн “их зогсолт”-ыг зургадугаар сарын 28-ны 18:00 цагаас 30-ны өдрийн 18:00 цаг хүртэл үргэлжлүүлэхээр төлөвлөсөн ч уурхайчин хамт олон 490 багц ажлыг 47 цагийн хугацаанд чанарын өндөр түвшинд гүйцэтгэж, төлөвлөсөн хугацаанаас нэг цагийн өмнө үйлдвэрээ амжилттай залгалаа. Одоо технологийн жигдрүүлэх үйл явц үргэлжилж байна. Энэ үеэр гэнэтийн асуудал, хүндрэл бэрхшээл гараагүй, гэж “Эрдэнэт үйлдвэр” ТӨҮГ-ын Механикийн хэлтсийн дарга - Ерөнхий механикч Б.Чинзориг мэдээлэв. 
Үйлдвэрийн удирдлага, хамт олон нэгэн зорилгын дор хүчээ нэгтгэн “их зогсолт”-ын бэлтгэлээ бүрэн хангаж, зохион байгуулалт сайтай ажилласан нь их засвар хугацаандаа чанартай дуусаж, үйлдвэрлэлээ хүндрэл, саадгүй залгах боломж бүрдүүлжээ. “Их зогсолт”-ын ажилд давхардсан тоогоор 1500 орчим хүн, засварын 490 багц ажлыг Баяжуулах үйлдвэр, Ус хангамжийн цех, Холбоо, мэдээллийн технологи, автоматжуулалтын цех, Цахилгаан цех зэрэг бүтцийн нэгжид гүйцэтгэсэн байна. Туслан гүйцэтгэгчээр “Техмонтаж”, “Засагт Алтай”, “Цагаан хорол”, “Бридж констракшн” компаниуд ажиллажээ. 
Энэ жилийн “их зогсолт”-ын бэлтгэл ажлын хүрээнд 478 нэр төрлийн сэлбэг хэрэгсэл, бараа материал захиалсныг 53 тендер болгон багцалж, зохих хууль, журмын дагуу зохион байгуулан, нийлүүлэлтийг ханган ажиллав.