“Гэрэлт эмэгтэй” хөтөлбөр амжилттай хэрэгжиж байна

Эрдэнэт үйлдвэрийн Эмэгтэйчүүдийн холбооны 2025 оны “Шилдэг төсөл”-өөр шалгарсан “Гэрэлт эмэгтэй” хөтөлбөр амжилттай хэрэгжиж байна. 
ХАБЭА-н хэлтэс болон “Эрдэнэт” сувиллын цогцолборын хамтран хэрэгжүүлж буй тус хөтөлбөрт есөн бүтцийн нэгжийн өөрийгөө хөгжүүлэх хүсэл эрмэлзэлтэй, бодисын солилцоо болон сэтгэлзүйн дэмжлэг шаардлагатай 15 эмэгтэй ажилтан хамрагдаж байгаа юм. 
Тус хөтөлбөр тавдугаар сарын 12-нд эхэлсэн бөгөөд хоёр сарын хугацаанд үргэлжилж, үр дүнгээ тайлагнах төлөвлөгөөтэй. 
Хөтөлбөрийн үндсэн зорилго нь оролцогч эмэгтэйчүүдийн биеийн болон сэтгэлзүйн эрүүл мэндийг цогцоор нь дэмжих, дотоод сэтгэлээ танин мэдэх, сэтгэл хөдлөл болон зан үйлээ хянах чадамжийг дээшлүүлэх замаар амьдралын чанарыг сайжруулахад чиглэж байна, гэж Хөдөлмөрийн эрүүл ахуйч О.Орхончимэг ярилаа. 
Хөтөлбөрийн үйл ажиллагаа долоо хоног бүрийн даваа, лхагва, баасан гарагт “Эрдэнэт” сувиллын цогцолборын дөрөвдүгээр давхрын “Стресс тайлах төв”-д сэтгэл зүйн боловсрол олгох сургалт, эрүүл мэндийн мэдээлэл, дасгал хөдөлгөөн, бясалгал, дотоод хөгжлийг дэмжих билиг талын мэдлэг, аутотренинг гэсэн гурван чиглэлээр явагдаж байна. Хөтөлбөрийн хүрээнд сэтгэц оношилгоо, бүлгийн ярилцлага, сэтгэл засал, йог, бясалгал, далд ухамсар болон эрчим энергийн талаарх хичээл, эмэгтэйчүүдийн эрүүл мэнд, бодисын солилцоо, эрүүл амьдралын хэв маягт чиглэсэн зөвлөмж мэдээлэл зэргийг мэргэжлийн баг бүрэн хүргэж байна.
“Гэрэлт эмэгтэй” хөтөлбөр нь зөвхөн бие махбодын биш, сэтгэл санааны тэнцвэрт байдлыг хангах, амьдралын чанарыг сайжруулах оновчтой шийдэл болж байгаагаараа онцлог юм. Эмэгтэй ажилтнуудын хөгжилд чиглэсэн энэхүү жишиг хөтөлбөр нь Эрдэнэт үйлдвэрийн Эмэгтэйчүүдийн холбооны хөгжлийн бодлогыг хэрэгжүүлэхэд томоохон хувь нэмэр оруулж байгааг тус холбооны Тэргүүн Х.Оюунтунгалаг онцоллоо.