Эрдэнэт үйлдвэрт хэрэгжиж буй Хүний нөөцийн хөгжлийн цогц хөтөлбөрийн нэг болох “Залуу ажилтныг дэмжих хөтөлбөр”-ийн энэ жилийн сургалт өнөөдөр эхэллээ. Үйлдвэрийн газрын 29 бүтцийн нэгжийн нийт 2236 залуу ажилтнаас шалгарч тус хөтөлбөрт шинээр оролцож буй 100 залуу ажилтан “Хувь хүний хөгжил ба багийн амжилт” сэдвийн дор хөтөлбөрийн эхний сургалтдаа ийнхүү хамрагдлаа. Тэд бүтэн нэг өдрийг мэдлэгээ тэлж, өөр хоорондоо танилцан, багаар ажиллаж, хөгжилтэй даалгаврууд гүйцэтгэн, инээд хөөр, урам зориг дүүрэн өнгөрүүлсэн юм. Энэ удаагийн сургалтыг “Залуу ажилтныг дэмжих хөтөлбөр” хэрэгжүүлэх Дэд ажлын хэсэг, “Teamwork & Teamplay Mongolia” сургалтын төвтэй хамтран зохион байгууллаа.
Энэ үеэр, хөтөлбөрт оролцогч 100 залуу ажилтныг нийт 10 багт хуваарилснаа ажлын хэсгээс танилцуулсан. Залуу ажилтнууд тус бүр 10 хүний бүрэлдэхүүнтэй багийн зохион байгуулалттайгаар цаашид бүхий л үйл ажиллагаандаа хамрагдах юм.
“Хүний нөөцийн хөгжлийн цогц хөтөлбөрийг хэрэгжүүлэх зорилгоор Төв болон дэд ажлын хэсэг байгуулагдсан. Залуу ажилтныг дэмжих хөтөлбөр хоёр жилийн хугацаанд хэрэгжих бөгөөд манай дэд ажлын хэсгийн баг зургаан хүний бүрэлдэхүүнтэй ажиллаж байна. Хөтөлбөрийн маань эхний сургалтыг “Teamwork & Teamplay Mongolia” сургалтын төвийн багш Б.Цэлмэг удирдан явууллаа. Хөтөлбөрт шинээр хамрагдаж буй 100 залуу ажилтандаа амжилт хүсье” хэмээн Дэд ажлын хэсгийн ахлагч, Дулааны цахилгаан станцын Турбины хэсгийн дарга Ч.Баярмагнай ярилаа.
Нар минутад мандаж минутад жаргана.
Үс засуулвал: 
Суудал: 
