ШУТИС-ийн харьяа, Ш.Отгонбилэгийн нэрэмжит “Эрдэнэт цогцолбор” дээд сургуулийн 2024-2005 оны хичээлийн жилийн хаврын улирлын 26 дахь удаагийн төгсөлтийн “Эрдмийн баяр” өнөөдөр боллоо. “Эрдмийн баяр”-ын үйл ажиллагаанд “Эрдэнэт үйлдвэр” ТӨҮГ-ын удирдлагууд, “Эрдэнэт цогцолбор” дээд сургуулийн Эрдмийн зөвлөлийн гишүүд, багш, ажилтнууд, эцэг, эхийн төлөөлөл хүрэлцэн ирж, төгсөгч нартаа баяр хүргэн оролцлоо. Энэ хичээлийн жилийн төгсөлтийн “Эрдмийн баяр”-аар лицей ахлах сургуулийн болон бакалавр, магистрын зэрэгтэй нийт 192 төгсөгч гэрчилгээ, диплом, энгэрийн тэмдгээ гардав.
“Эрдэнэт үйлдвэрийн Захиргаа, удирдлага, санхүүгийн газрын дарга Д.Баярбат, “Эрдэнэт цогцолбор” дээд сургуулийн захирал, доктор Д.Заяабаатар, Хүний нөөц, захиргааны хэлтсийн албаны дарга Б.Одгарьд нар төсөгчдөд хандан баяр хүргэж, цаашдынх нь ажил, амьдралд өндөр амжилт хүслээ. Тус сургуулийг сурлага, хөдөлмөрөөрөө манлайлан төгссөн Цахилгаан системийн автоматжуулалт инженер Э.Отгонцэцэг, Уурхайн машин тоног төхөөрөмжийн инженер О.Доржсэмбэ, Мэдээллийн технологийн инженер Э.Цэдэнсодном, Г.Солонго, Уул уурхайн ашиглалтын технологич Б.Ням-Осор, Ашигт малтмал баяжуулалтын технологи мэргэжлээр төгссөн Б.Өгөөмөр, Ч.Гантогтох, С.Энхсаруул нарын шилдэг тэргүүний төгсөгчдөд эзэмшсэн мэргэжлээрээ “Эрдэнэт үйлдвэр” ТӨҮГ-т ажиллах “Батламж” гардуулав.
Түүнчлэн, Ашигт малтмал баяжуулалтын технологи мэргэжлийн төгсөгч С.Энхсаруул эрдэм шинжилгээ, судалгааны ажилд бусдыгаа манлайлан оролцож, найман улирал дараалан 3.7-оос дээш голчтой суралцсан амжилтаараа ШУТИС-ийн “Шилдэг төгсөгч”-ийн өргөмжлөл гардлаа.
“Эрдэнэт цогцолбор” дээд сургуулийн захирал, доктор Д.Заяабаатар: “Манай сургуулийн 26 дахь төгсөлтийн Эрдмийн баяр сайхан боллоо. 2024-2025 оны хичээлийн жил бидний хувьд амжилт ололт арвин байлаа. Бакалаврын таван хөтөлбөрөө үндэсний хэмжээнд магадлан итгэмжлүүллээ. Үүнээс гадна Боловсролын байгууллагаас дөрөв дэх удаагаа магадлан итгэмжлэлийг 10 жилийн хугацаатай авсан. Саяхан, Монгол Улсын Боловсролын сайдын 311 тоот тушаалаар ШУТИС-ийн харъяа "Эрдэнэт цогцолбор" дээд сургуулийг Мэргэжлийн их сургуулийн ангилалд хамруулсан. Ингэснээр, манай сургууль цаашид их сургуулийн статустайгаар буюу "Эрдэнэт цогцолбор" их сургууль нэртэйгээр үйл ажиллагаагаа явуулах нөхцөл бүрдээд байна. Ийнхүү манай сургуулийн хамт олон энэ хичээлийн жилээ амжилт бүтээл арвин дүүргэж, өнөөдөр ахлах сургуулийг 59, бакалаврын 104, магистрын зэрэгтэй 29 хүн төгсөж, диплом, гэрчилгээгээ гардан авлаа. Нийт хүрэлцэн ирсэн хүндэт зочид, эцэг, эхчүүд, багш, ажилтнууддаа баярлалаа. Төгсөгчдөдөө Эрдмийн баярын мэнд хүргэж, цаашдын ажил үйлсэд нь өндөр амжилт хүсэн ерөөе” гэв.
Нар минутад мандаж минутад жаргана.
Үс засуулвал: 
Суудал: 
