Эрдэнэт үйлдвэрийн Ойн генетик нөөцийн төвийн дэмжлэгтэйгээр Орхон аймгийн 4-р сургуулийн С.Одзаяа багштай 3г анги “Хүн ба Орчин”-ы хичээлийг танхимаас гадуур хамтран зохион байгууллаа.
Сурагчид байгаль орчныг хамгаалах ач холбогдол, мод ургамлын төрөл зүйл, тэдгээрийн онцлог, уур амьсгалд үзүүлэх нөлөөллийн талаар мэдээлэл авч, ашигт болон нэн ховор ургамлын үрийн сангийн ач холбогдлыг ойлгожээ. Мөн үрээр мод тарих, ургуулах арчилгааны зөвлөмж сонсож, тасалгааны ургамлын үрсэлгээ суулгаж, бэлгэнд авсан нь тэдний байгальд хандах хандлагад эерэг нөлөө үзүүлсэн юм.
Энэ үеэр сурагчдад Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөн болон түүний хүрээнд Эрдэнэт үйлдвэрт хэрэгжиж буй ажлуудын талаар танилцууллаа. Эрдэнэт үйлдвэрийн Ногоон хөгжил төслийн нэгжийн мэдээлснээр, энэ жил тус үйлдвэр 150 мянган мод тарихаар төлөвлөснөөс 45 мянга нь шилмүүст, 105 мянга нь навчит мод байх юм. Бүх нийтийн мод тарих өдрөөр үйлдвэрийн 650 ажилтан гэр бүлийн хамт 3000 улиас тарьжээ.
Мөн “Эрдэнэс Монгол” нэгдлийн долоон харьяа байгууллага шинэ Хархорин хот орчимд нийт 1500 орчим га талбайд ногоон байгууламж байгуулах ажлыг хамтран хэрэгжүүлж байна. Түүнчлэн Булган аймгийн Сэлэнгэ сумын “Шар тал” хэмээх газарт Хангайн бүсийн мод үржүүлгийн “Эрдэнэт” цогцолборын бүтээн байгуулалт эхэлж, 5.8 км хашааны ажил 96 хувь, 143 га талбайн усалгааны системийн угсралт бүрэн дуусчээ.
Ийнхүү хүүхэд багачуудаас эхлэн байгаль орчинд ээлтэй ирээдүйн төлөөх ажил Эрдэнэт үйлдвэр, орон нутгийн хамтын оролцоотойгоор үргэлжилж байна.
Нар минутад мандаж минутад жаргана.
Үс засуулвал: 
Суудал: 
