“Эрсдэл” цахим постерийн уралдааны шилдгүүд тодорлоо

“Эрдэнэт үйлдвэр”-т эрсдэлийн соёлыг төлөвшүүлэх 2025 оны хөтөлбөрийн хүрээнд Дотоод хяналт, мониторингийн хэлтсээс үйлдвэрийн газрын ажилтнуудын дунд зарласан “Эрсдэл” сэдэвт цахим постерийн уралдааны дүн гарч, шилдгүүд тодорлоо. Үйлдвэрийн газар болон өөрийн бүтцийн нэгжийн үйл ажиллагаа, ажлын байранд учирч болзошгүй эрсдэлээс урьдчилан сэргийлэх шилдэг туршлага, санааг зурган постер хэлбэрээр илэрхийлэх энэхүү уралдаанд 60 орчим бүтээл ирсэн байна. 
Оролцогчид “Ажилтан бүр эрсдэл хариуцагч”, “Эрсдэлийг боломж болгоцгооё”, “Эрсдэлээ удирдаж, үр ашгийг нэмэгдүүлье”, “Эрсдэлийн удирдлага ба оновчтой шийдвэр”, “Эрсдэлийн удирдлага ба манлайлал”, “Эрсдэл миний нүдээр” зэрэг сэдвүүдээс сонгож бүтээлээ бэлтгэн ирүүлжээ. 
“Эрсдэл” сэдэвт цахим постерийн уралдааны Тэргүүн байрт “Эрдэнэт үйлдвэр” ТӨҮГ-ын Геологи, хайгуулын экспедицийн геологич Э.Баярбатын бүтээл шалгарсан бол дэд байрт Үйлдвэрлэл, техникийн хэлтсийн референт-нарийн бичиг А.Уянгаа, гуравдугаар байрт Засвар механикийн заводын Хайлах хэсгийн төмрийн бэлдэц бэлтгэгч М.Энх-Амгалан нарын бүтээл шилдгээр тодорч, өргөмжлөл, мөнгөн шагнал хүртсэн юм. Шилдгүүдийн шагналыг “Хамтын хөгжил-Сайн туршлага” зөвлөгөөний үеэр гардууллаа.