Эмэгтэйчүүдийн холбоо хөгжлийн бэрхшээлтэй хүүхэдтэй гэр бүлд халамж анхаарал хандуулав

Дэлхийн гэр бүлийн өдрийг тохиолдуулан “Эрдэнэт үйлдвэр” ТӨҮГ-ын Эмэгтэйчүүдийн холбооноос хөгжлийн бэрхшээлтэй, байнгын асаргаанд байдаг хүүхэдтэй ажилтнуудынхаа гэр бүлд чиглэсэн сэтгэл зүйн дэмжлэг, сэргээн засах тусламж үйлчилгээний цогц арга хэмжээ зохион байгууллаа.
Тус үйл ажиллагаанд Хүүхдийн сэргээн засах судлалын Монголын нийгэмлэг, Анагаахын шинжлэх ухааны Үндэсний их сургууль, Монгол-Японы эмнэлгийн эмч, багш нарын баг уригдан оролцож байна. Тэд “Эрдэнэт” сувиллын цогцолборт хоёр өдөр ажиллаж, хөгжлийн бэрхшээлтэй хүүхдүүдийг сэргээн засах эмчийн үзлэгт хамруулах, мэдрэл, яс булчингийн хэт авиан оношилгоо, эмчилгээ хийх, хөдөлгөөн болон хөдөлмөр заслын тусламж үйлчилгээ үзүүлэх юм.  
Хүүхдийн хөгжлийг дэмжих, сэргээн засах тусламж үйлчилгээг орон нутагт ойртуулахад чиглэсэн энэхүү үйл ажиллагаанд оролцогчид сэргээн засах анагаах ухааны үндсэн ойлголт, хүүхдийн өсөлт хөгжил, сэтгэл зүйн онцлог, хэл ярианы хөгжил, булчин чангарлын менежмент, хөдөлгөөн болон хөдөлмөр заслын ач холбогдол зэрэг сэдвээр мэдлэг, мэдээлэл авч, хүүхдийнхээ онош, эмчилгээний чиглэлийг тодорхойлуулах боломжийг бүрдүүлжээ.
Уг сургалтад Эрдэнэт үйлдвэрийн 60 гаруй ажилтан хамрагдсан бөгөөд тэд  “Эмэгтэйчүүдийн холбооноос санаачилан зохион байгуулсан энэ үйл ажиллагаа нь  хөгжлийн бэрхшээлтэй хүүхэдтэй гэр бүлүүдэд бодит дэмжлэг болж, өдөр тутмын амьдралд эерэг өөрчлөлт авчрах чухал алхам боллоо” хэмээн онцолж, талархлаа илэрхийлсэн юм.