“Эрдэнэт үйлдвэр” ТӨҮГ хүний нөөцийн мэргэжилтнүүдийнхээ мэдлэг, ур чадварыг ахисан түвшинд хөгжүүлэх зорилготой Сургалт - Хөгжлийн хөтөлбөрийг энэ онд хэрэгжүүлэхээр энэ сарын эхэнд нээлтээ хийлээ. Тус үйл ажиллагаанд Хүний нөөц, захиргааны хэлтсийн дарга, Менежментийн ухааны доктор (Ph.D) О.Отгонбаяр, хэлтсийн мэргэжилтнүүд болон Үйлдвэрийн газрын бүх бүтцийн нэгжийн хүний нөөцийн мэргэжилтнүүд оролцов.
Хүний нөөцийн менежментийн ISO 30400 олон улсын багц стандартыг Монгол Улсад баталгаажуулан гэрчилгээжүүлж, бодитоор анхлан хэрэгжүүлсэн төрийн өмчит уул уурхайн байгууллагын хүний нөөцийн мэргэжилтнүүд орчин цагт шаардлагатай олон ур чадварыг эзэмшихэд тэдний санаачилсан хөгжлийн уг хөтөлбөр чухал үр дүн авчирна гэж үзэж байна.
Нээлтийн үйл ажиллагааны үеэр, Хүний нөөц, захиргааны хэлтсийн дарга О.Отгонбаяр, “Бид бусдыг хөгжүүлэхийн зэрэгцээ өөрсдийгөө тасралтгүй чадавхжуулах шаардлагатай. Өнөө цагт өөр өөрийн онцлогтой үеүдээс бүрдсэн хүний нөөцийг удирдахад харилцааны зөөлөн ур чадвар нэн чухал. Манай баг хамт олон Эрдэнэт үйлдвэрийн хэмжээнд Хүний нөөцийн хөгжлийн цогц хөтөлбөрийг амжилттай хэрэгжүүлж байна. Бусдыг хөгжүүлэхийн төлөө хөрөнгө оруулалт хийсэн хэр нь эргээд харахад хөгжлөөс өөрсдөө үлдэж хоцорсон байхыг үгүйсгэхгүй. Энэ жил бид 2000 гаруй уурхайчдыг хамруулан хүний нөөцийн мэргэжилтнүүдийн үйл ажиллагаанд үнэлэлт, дүгнэлт өгөх санал асуулга явууллаа. Хэдийгээр 50 гаруй хувь нь “сайн” гэж үнэлж байгаа ч дутагдаж буй ур чадваруудыг ажилтнууд маань ил тод гаргаж илэрхийлсэн. Тэдний саналыг үндэслэн хөгжлийн энэхүү хөтөлбөрийг боловсруулж, хэрэгжүүлэхээр шийдвэрлэлээ” хэмээн онцолсон юм.
Эрдэнэт үйлдвэрийн хүний нөөцийн мэргэжилтнүүд олон улсын стандартыг үйл ажиллагаандаа амжилттай нэвтрүүлсний үр дүнд өнгөрсөн жил хүний нөөцийн салбарын хоёр томоохон шагнал хүртсэн. Энэ нь зөвхөн Эрдэнэт үйлдвэрт үр өгөөжөө өгөөд зогсохгүй салбарын хэмжээнд эерэг нөлөө үзүүлж, жишиг болохуйц сайн туршлагыг бий болгосон юм.
Нээлтийн үйл ажиллагаанд зориулсан уулзалт, ярилцлагын үеэр Эрдэнэт үйлдвэр ажилтнуудаа тасралтгүй сургаж хөгжүүлэх том бодлого хэрэгжүүлэн ажиллаж байгаа тухай, үр дүнд нь бүх цех, нэгжийн ажилтнуудад сурч хөгжих тэгш боломж нээлттэй байгаад талархаж явдгаа хүний нөөцийн мэргэжилтнүүд илэрхийлж байлаа. Хүний хөгжилд чиглэсэн хөрөнгө оруулалт хамгийн үнэ цэнтэй учраас энэхүү үйл явдлыг баярт мөч хэмээн хүлээн авч, өөрсдийн сэтгэгдлээ хуваалцсан юм.
Нар минутад мандаж минутад жаргана.
Үс засуулвал: 
Суудал: 
