УДИРДАХ АЖИЛТНЫ ШУУРХАЙ ЗӨВЛӨГӨӨНИЙ ТОЙМ

Эрдэнэт үйлдвэрийн удирдах ажилтны даваа гаргийн ээлжит шуурхай зөвлөгөөнийг Ерөнхий инженер Т.Батмөнх удирдлаа. Байгаль орчин, ногоон хөгжлийн хэлтсээс, хуурайшилт их байгаагаас шалтгаалан цагаан тоос дэгдэх үзэгдэл ажиглагдаж байгаа тул цагаан тоос дарах ажлыг эрс эрчимжүүлж, намираа хоолой ашиглан норгож байгааг мэдээлэв. Мөн цагаан тоосны нөлөөллийн бүсийн иргэдийг эрүүл мэндийн үзлэгт хамруулах ажил 37 хувийн гүйцэтгэлтэй яваа, мөн үйлдвэрийн хэмжээнд хаврын мод тариалах ажлыг зохион байгуулах бэлтгэл хангагдаж байгааг танилцууллаа. 
Ой, хээрийн түймэрт нэрвэгдэж байгаа Сэлэнгэ аймгийн зарим сумдад техникийн туслалцаа үзүүлэхийг хүссэн албан бичиг Аж үйлдвэр, эрдэс баялгийн яамнаас ирсний дагуу тус аймгийн Түшиг суманд Эрдэнэт үйлдвэрээс техник ажиллуулж байгааг Үйлдвэрлэл, техникийн хэлтсээс мэдээлэв.  
Баяжуулах үйлдвэр хавар, зуны бэлтгэл ажлын хүрээнд 13 ажил төлөвлөсөн нь 46 хувийн гүйцэтгэлтэй байна. Хам баяжуулалтын хоёрдугаар секцийг шинэчлэх ажил төлөвлөгөөний дагуу явагдаж, барилгын гүйцэтгэл ч боломжийн түвшинд явааг тус цехийн дарга М.Отгон мэдээлсэн. Энэ сарын 20-ноос машинуудыг байрлуулж эхлэхээр төлөвлөж байна гэв. 
Өнгөрсөн долоо хоногт Усны зохицуулах хороо тусгай зөвшөөрөл эзэмшигч байгууллагуудын жилийн ажлыг дүгнэхэд Ус хангамжийн цех “хангалттай сайн” үнэлгээ авчээ. Тус цехийн гурван жилийн хугацаатай тусгай зөвшөөрөл энэ оны наймдугаар сард дуусахтай холбогдуулан баримт материалыг бүрдүүлэн хүргүүлсэн байна. 
Барилга засварын цехээс “Найрамдлын Эрдэнэс” хүүхдийн зуслангийн засварын ажил өнөөдрөөс эхэлж байгааг мэдээллээ. Соёл, спортын “Эрдэнэт” цогцолборын бүтээн байгуулалт үргэлжилж байна. Дээврийн найман агааржуулагчийг өнгөрсөн долоо хоногт угсарч дуусжээ. Энэ долоо хоногт үзэгчдийн сандлыг суурилуулна. Ирэх сард Улсын комисс ажиллуулахаар төлөвлөж байна, гэж тус цехийн Ерөнхий инженер Ж.Батсуурь танилцууллаа. 
Энэ жилийн “их зогсолт”-оор 450 ажил хийхээр баталсан байна. Өнөөдөр дөрвөн тендерийн бараа, материал нийлүүлэгдсэнийг Механикийн хэлтсийн дарга Б.Чинзориг мэдээлээд, цаг хугацаа алдахгүй, худалдан авалтад анхаарч ажиллахыг хүслээ.     
Шуурхай зөвлөгөөний төгсгөлд, өнгөрсөн лхагва гаргийн Засгийн газрын хуралдаанаас гаргасан “Үүсмэл ордын талаар авах арга хэмжээний тухай” гурван заалт бүхий тогтоолыг танилцууллаа. Үүнд, Монгол Улсад гадаадын хөрөнгө оруулалт татах, валютын орох урсгалыг нэмэгдүүлэх, ашигт малтмалын нөөцийг бүрэн ашиглах зорилгоор стратегийн ач холбогдол бүхий Эрдэнэтийн-Овоо ордыг ашиглах явцад үүссэн, одоогоор ашиглагдахгүй байгаа бага агуулгатай хүдрийн овоолгыг богино хугацаанд ашиглаж, эдийн засгийн эргэлтэд оруулах чадавх бүхий хөрөнгө оруулалтын сонгон шалгаруулалтыг хууль тогтоомжид нийцүүлэн ил тод байх зарчмаар явуулах. Мөн Эрдэнэтийн зэс, молбиденын ордыг ашиглаж байгаа катодын зэсийн үйлдвэрт хийсэн хувийн хэвшлийн хөрөнгө оруулалт, хувийн хэвшлийн үйлдвэрт ажиллаж байгаа ажилчдын эрх ашиг, цаашдын тогтвортой байдлыг хангах үүднээс төр, хувийн хэвшилтэй өрсөлдөхгүй байх зарчмыг баримтлан “Эрдэнэт үйлдвэр” ТӨҮГ-ын барихаар төлөвлөсөн исэлдсэн хүдрийн овоолгоос катодын зэс үйлдвэрлэх үйлдвэрийн төслийг зогсоож, хөрөнгө оруулалтыг илүү үр ашигтай, өндөр технологийн эцсийн бүтээгдэхүүн үйлдвэрлэхэд зориулагдахаар арга хэмжээ авч ажиллахыг “Эрдэнэс Монгол” нэгдэл болон “Эрдэнэт үйлдвэр” ТӨҮГ-ын удирдлагуудад даалгасан шийдвэр гарсныг танилцуулснаар шуурхай зөвлөгөөн өндөрлөлөө.