Хойд бүсийн хөгжлийн асуудлаар хэлэлцэж байна

Өнөөдөр Булган аймагт эхэлсэн Хойд бүсийн зөвлөлийн анхдугаар хуралдааны хүрээнд үндсэн таван салбар хэлэлцүүлэг явагдсан бөгөөд “Хойд бүсийн иргэдийн амьдралын чанар тулгамдсан асуудлууд” сэдэвт хэлэлцүүлэгт бүс нутгийн хөгжлийн гол хөдөлгүүр нь Эрдэнэт үйлдвэрийг түшиглэн байгуулах Үйлдвэрлэл, технологийн парк, тэр дундаа зэс хайлуулах, боловсруулах үйлдвэр байх талаар онцоллоо. Мөн “Эрдэнэт үйлдвэр" ТӨҮГ-ын харьяа "Эрдэнэт медикал" төрөлжсөн мэргэшлийн эмнэлгийг Эрүүл мэндийн яамны харьяанд шилжүүлэх, Орхон аймагт хойд бүсийн "Сургалт-эрдэм шинжилгээ- үйлдвэрлэлийн цогцолбор" байгуулах, Хойд бүсийн мал аж ахуйн гаралтай бүтээгдэхүүний үйлдвэрийг төр, хувийн хэвшлийн түншлэлийн хүрээнд байгуулах, Орон нутгийн хөгжлийн төвүүдэд "Мал аж ахуйн гаралтай бүтээгдэхүүний үйлдвэр, логистикийн төв" байгуулах, Бүсийн тэргүүлэх чиглэл, нийгэм, эдийн засгийн онцлогтой уялдуулан ялгаатай татвар тогтоох, Хавдар судлалын үндэсний төвийн харьяа Бүсийн хавдрын оношилгоо, эмчилгээний дэд төв болгон хөгжүүлэх, Эрдэнэт хотын үнэт цаас гаprax, Хойд бүсийн аялал жуулчлалын салбарт үйл ажиллагаа эрхлэгчдэд бага хувийн хүүтэй зээл олгох боломжийг судлах зэрэг санал гаргаж, УИХ-ын өргөтгөсөн хуралдаанд танилцуулахаар болов. 
Монгол Улсын хөгжлийн бодлого "Алсын хараа-2050", "Бүсчилсэн хөгжлийн үзэл баримтлал", "Шинэ сэргэлтийн бодлого"-д нийцүүлж, хөгжлийн тулгамдсан асуудлыг цаг алдалгүй, хурдтай шийдвэрлэхийн тулд Засгийн газар 2024-2028 оны үйл ажиллагааны хөтөлбөртөө “Бүсчилсэн хөгжлийн бодлого”-ыг тэргүүлэх зорилт болгон хэрэгжүүлэхээр тусгасан. 
“Бүсийн зөвлөл анхдугаар хуралдаан”-ыг бүс тус бүрээр зохион байгуулахаар төлөвлөсний дагуу Хойд бүсийн зөвлөлийн анхдугаар хуралдаанд Монгол Улсын Ерөнхий Сайд Л.Оюун-Эрдэнэ тэргүүтэй Улсын Их Хурлын гишүүд, Засгийн газрын гишүүд, төрийн захиргааны байгууллагууд, Хойд бүсийн Булган, Орхон, Хөвсгөл аймгийн төлөөлөл, бүсийн зөвлөлийн гишүүд, хойд бүсийн аймаг, сумдын бүх шатны төрийн байгууллагын төлөөлөл, төр хувийн хэвшил, олон улсын байгууллага, эрдэмтэд, иргэдийн төлөөлөл зэрэг нийт 700 орчим төлөөлөгч оролцож байна.