“Эрдэнэт үйлдвэр” ТӨҮГ-ын Хүний нөөцийн хөгжлийн цогц хөтөлбөрийн нэг болох “Шинэ ажилтны дасан зохицох хөтөлбөр”-ийн 2025 оны нээлтийн үйл ажиллагаа өнөөдөр “Оюу” танхимд боллоо. Энэ үеэр Ерөнхий захирал Г.Ёндон Эрдэнэт үйлдвэрт 2024 оны IV, 2025 оны I улиралд ажилд орсон шинэ ажилтнуудад хандан мэндчилгээ дэвшүүлж, үйлдвэрийн газрын өнөөгийн бодлого, стратеги, хөгжлийн чиг хандлагын талаар илтгэл тавьж, дэлгэрэнгүй мэдээлэл хийв. Ингэхдээ ажилтан бүр өөрийн брэндийг хөгжүүлж, үнэ цэнтэй ажилтан болохын чухлыг онцлон захисан. Өөрөөр хэлбэл, "байхдаа нэмэргүй, байхгүйдээ үгүйлэгддэггүй ажилтан байж болохгүй. Чамаар баялаг бүтээгч хамт олон дутдаг, тийм л ур чадвартай, сэтгэлтэй, өөрийн гэсэн орон зайтай, брэндээ хөгжүүлсэн үнэ цэнтэй ажилтан байх хэрэгтэй. Энэ бол зөвхөн чиний бус, үйлдвэрийн ирээдүйн эрхэм үнэт зүйл" хэмээн онцлов. Мөн тэрээр Монгол Улсын баатар Эрдэнэт үйлдвэрийн уурхайчид бид шинэ ажилтнууд та бүхнийг эгнээндээ баяртайгаар угтан авч байна. Шинэ ажилтан бүрийн ирээдүйд хандсан эрмэлзэл, мэдлэг ур чадвар нь үндэсний баялаг бүтээгч хамт олны шинэчлэл, хөгжилд үнэтэй хувь нэмэр оруулж, шинэлэг санаа, бүтээмжийг авчирна гэдэгт бүрэн итгэж байгаагаа илэрхийлсэн юм.
Энэ үеэр Хүний нөөц, захиргааны хэлтсийн дарга О.Отгонбаяр үйлдвэрийн хүний нөөцийн бодлого болон Хүний нөөцийн хөгжлийн цогц хөтөлбөрийн хэрэгжилтийн явц, үр дүнгийн талаар танилцуулга хийв. Мөн үйлдвэрийн туршлагатай ажилтнууд болох Баяжуулах үйлдвэрийн дарга М.Отгон, механикч Н.Хангай, Дулааны цахилгаан станцын Турбины хэсгийн дарга Ч.Баярмагнай нар өөрсдийн амжилтын түүх, мерит зарчмыг баримтлан мэргэжлийн ур чадвар, гүйцэтгэл, хичээл зүтгэлээр хэрхэн шат дараалан дэвшин ажиллаж ирсэн туршлагаасаа хуваалцсан нь шинэ ажилтнуудад урам сэдэл өгөх, үлгэр дуурайлал болохуйц байлаа.
Өнөөдрийн байдлаар Эрдэнэт үйлдвэрийн нийт ажилтны 66 хувийг эрэгтэйчүүд, 34 хувийг эмэгтэйчүүд бүрдүүлж байна. Хүний нөөцийн бодлогын ил тод, шударга байдал нэмэгдэж, 2016 онд долоон ажлын байрыг нээлттэй зарлаж байсан бол 2024 онд сул орон тооны 90 гаруй хувийг хөдөлмөрийн зах зээлд нээлттэй зарлан, сонгон шалгаруулалтаар авьяас, чадвартай ажилтнуудыг татан оролцуулах болсноор хүний нөөцийн шинэ үеийг бүрдүүлж буй онцгой үе шат өрнөж байна.
Шинэ ажилтны өмнө үйлдвэрийн орчин, цагийн хуваарь, хөдөлмөрийн нөхцөл, арга ажиллагаа, хөдөлмөрийн аюулгүй байдал, удирдлага, хамт олонтойгоо бүх талаар дасан зохицох шаардлага, сорилт тулгардаг. Иймээс “Эрдэнэт үйлдвэр” ТӨҮГ шинэ ажилтнууддаа үйлдвэрийн газрын нөхцөл, үйл ажиллагаа, соёлд сэтгэл зүйн болоод мэргэжлийн хувьд дасан зохицоход туслах зорилгоор “Шинэ ажилтны дасан зохицох хөтөлбөр”-ийг дөрөв дэх жилдээ амжилттай хэрэгжүүлэхээр ийнхүү нээлтээ хийлээ.
Энэ үеэр “Эрдэнэт үйлдвэр” ТӨҮГ-ын Ерөнхий захирал, доктор (Ph.D) Г.Ёндонтой уулзаж, шинэ ажилтнуудад гол хэлэхийг хүссэн үг юу байсан талаар тодрууллаа.
Монгол Улсын төсвийг бүрдүүлэгч, уул уурхайн салбарын ууган манлайлагч Эрдэнэт үйлдвэр шинэ ажилтнуудаа албан ёсоор угтан авч, тэдэнд үйлдвэрийнхээ бодлого, зорилго, стратегийг дэлгэрэнгүй танилцууллаа. Энэ салбарт 30 гаруй жил ажилласан хүний хувьд, Ерөнхий захирлын хувьд шинэ ажилтнууддаа тусгайлан мэндчилгээ дэвшүүлж, туршлагаасаа хуваалцаж, бас захиас зөвлөгөө өгч, үйлдвэрийнхээ өнөөгийн амжилт, ирээдүйн хөгжлийн чиг хандлагын талаар ярилаа. Эрдэнэт үйлдвэр бол зөвхөн баялаг бүтээдэг уурхай биш, харин улс орны хөгжлийн хөтөч, нийгмийн тогтвортой байдлын тулгуур. Бид өнөөдөр олон улсын жишигт нийцсэн томоохон төсөл, хөтөлбөрүүдийг амжилттай хэрэгжүүлж байна. Үйлдвэрийн маань ирээдүйн ашиглалтын нөөц хангалттай. Бидний гол зорилго бол эдийн засгийн өрсөлдөх чадвараа улам бэхжүүлэх, хойч үеийнхэндээ илүү сайхан ирээдүйг өвлүүлэх юм. Шинэ ажилтнууддаа өндөр итгэл хүлээлгэж байгаагаа энэ уулзалтаар хэлэхийг хүссэн. Бидний зүгээс анхаарал халамж, дэмжлэг, чиглүүлэг байнга байх болно. Бид хамтдаа илүү бүтээлч уур амьсгал, шинэлэг сэтгэлгээ, үр дүнтэй хамтын ажиллагааг бий болгож, нэг зүг рүү харж ажиллаж чадна гэдэгт бүрэн дүүрэн итгэж байгаагаа хэллээ. Шинэ ажилтнууд маань урам зоригтой, эрч хүчтэй, сайхан харагдаж байна, гэв.
Нар минутад мандаж минутад жаргана.
Үс засуулвал: 
Суудал: 
