Эрдэнэт үйлдвэрийн цех, нэгжүүдэд хэрэгжиж буй “Мэдлэг түгээх ажлын байр” төслийн хүрээнд Дулааны цахилгаан станцын хамт олон номын сангийн өрөө тохижуулан, нээлээ. Ажлын байрандаа мэдлэг мэдээллээ зузаатган, ур чадвар, дадлага туршлагаа дээшлүүлэх, сурч хөгжих боломж олгох зорилго бүхий “Мэдлэг түгээх ажлын байр” төсөл ийнхүү ДЦС-д “Номын өргөө” хэлбэрээр хэрэгжиж байна. Энэхүү санаачилгыг Цахилгаан техникийн хэсгийн ахлах эрчим зүйч Б.Ганзориг болон тус хэсгийн хамт олон гаргаж, цехийн захиргааны 4-р байр буюу Цахилгаан техник, Засвар механикийн хэсгийн байранд номын сангаар үйлчлэх уншлагын өрөө тохижуулан, бэлэн болгожээ.
Нээлтийн үеэр Орхон аймгийн Нийтийн номын сангийн Номын санч Д.Отгонцэцэг оролцож, "Монголын уран зохиолын боть" номын дээжээс бэлэг барьсан бол ДЦС-ын ажилтнууд номын хандивын аян өрнүүлж, үүнд цугласан 300 гаруй номыг мөн гардуулсан юм.
Мөн “Номын өргөө”-г ажилтнууддаа илүү хүртээмжтэй болгох, ном унших сэдэл санааг идэвхжүүлж дэлгэрүүлэхийн тулд цахим номын сан нээхээр “Эрдэнэт цогцолбор" дээд сургуультай хамтран ажиллаж буйг Ахлах эрчим зүйч Б.Ганзориг онцоллоо. Тэрээр, “ДЦС-ын үе үеийн хамт олон өөрийн цех дотроо номын сантай болох хүсэл мөрөөдлийг удаан хугацаанд тээж ирсэн. Энэ мөрөөдөл биелсэнд баяртай байна. Ахмад үеийнхэн болон эрдэмтэн судлаачдын бичиж үлдээсэн мэргэжлийн гарын авлага, заавар зөвлөмж, улмаар уран зохиолын ном уншиж мэдлэгээ тэлж, суралцах боломжийг ашиглан, ажлын бус цагаа үр өгөөжтэй өнгөрүүлэхийг хүсье” хэмээн хамт олондоо уриалав.
Мөн цехийн ажилтнуудынхаа ном унших идэвх санаачилгыг дэмжин, хамгийн олон ном уншсан ажилтныг шалгаруулан, гадаадад аялах эрхийн бичгээр шагнаж урамшуулна гэдгийг ДЦС-ын ҮЭ-ийн хорооны дарга Б.Төржаргал нээлтийн үеэр мэдээлсэн юм. “Номын өргөө”-ний нээлтэд тус цехийн авьяаслаг ажилтнууд ая дуугаа өргөж, хамт олондоо мэндчилгээ дэвшүүллээ.
Нар минутад мандаж минутад жаргана.
Үс засуулвал: 
Суудал: 
